Dayikên Aştiyê ku bi daxwaza azadiya fizîkî ya Rêberê Gelê Kurd Abdullah Ocalan û avêtina gavên şênber ji bo pêvajoyê hatibûn Enqereyê di seatên evarê de çalakiya xwe ya nobedê didomînin.
Meclisa Dayikên Aştiyê ku bi 30 dayikan pêktê li 24 bajarên Bakurê Kurdistanê û Tirkiyeyê hatibûn Enqereyê li vir dest bi çalakiya nobedê kirin. Dayikên Aştiyê ku piştî li ber meclisê daxuyanî dan derbasî parka Kurtuluşê bûn û li vir di konê ku vergirtibûn de dest bi nobede kirin. Dayikên Aştiyê di seatên evarê de jî nobeda xwe didomînin. Endam û nûnerên saziyên sivîl û partiyên siyasî jî ji bo piştgiriyê serdana nobeda dayikan dikin.
Dayikên Aştiyê, bi stranên aştiyê û gerandina govendê nobeda xwe di konan de didomînin. Dayikên Aştiyê dê şevê di konan de derbas bikin û sibê jî berê xwe bidin meclisê. Dayikên Aştiyê dê li meclisê serdana komên partiyên siyasî bikin, daxwaz û pêşniyarên xwe vebêjin.
