Li navçeya Rêya Armûşê ya Wanê, ji aliyê şaredariyê ve Parka Mehmet Uzun hat vekirin. Di vekirina parkê de bal hate kişandin ser Pêvajoya Aştî û Civaka Demokratîk, qanûna nû ya meclisê û têkoşîna li dijî polîtîkayên qeyûman.
Li navçeya Rêya Armûşê ya Wanê, bi pêşengiya Şaredariya Rêya Armûşê re Parka Mehmed Uzun hat vekirin. Di çalakiyê de posterê Rêberê Gelê Kurd Abdullah Ocalan hat vekirin û dirûşmên “Bijî Serok Apo”, “Ciwan fedaiyên Apo ne” û “Bê Serok jiyan nabe” hatin berzkirin. Di çalakiya vekirinê de nûnerên partiyên siyasî, rêxistinên civaka sivîl, Parlamenterê DEM Partiyê yê Wanê û gelek welatî amade bûn
‘Wan a me ye û em ê xwedî lê derkevin’
Di vekirina parkê de Hevşaredara Rêya Armûşê Canan Uzunay axivî û bal kişand ser jiyan û berhemên nivîskarê Kurd Mehmet Uzun û got: “Wek ku Mehmet Uzun gotî, em zarokên êş û elemê ne. Îro em ji bo vekirina parka Mehmet Uzun li vir in; em hêvî dikin ku ev park ne tenê parkek, di heman demê de bibe wesîleya aştiyê jî. Nêzîkî du salan e şaredariya me di nav xizmeta gel û deynan de ye, lê me ev yek nekir behane û me xebatên xwe meşandin. Li dijî polîtîkayên ku li ser ciwanan tên meşandin, em ê wek şaredarî li cem kesên li ber xwe didin rawestin. Wan ya me ye û em ê bi hişmendiyeke paqij Waneke paqij ava bikin.”
‘Rêber Apo bang kir û berpirsiyarî da hemû gelan’
Pey re Hevşaredara Bajarê Mezin a Wanê Neslihan Şedal axivî û girîngiya pêvajoya nû anî ziman û wiha domand: “Em spasiya kesên di vê têkoşîna pîroz de cih digirin dikin. Me her qad veguhast qada berxwedanê. Em bi salan e ji bo azadî û çanda xwe li ber xwe didin. Em derbasî pêvajoyeke nû bûn ku di nav vê pêvajoyê de azadî û aştî heye. Ev têkoşîna pîroz bi saya Birêz Abdullah Ocalan e. Banga pêvajoya aştiyê hat kirin û vê bangê berpirsiyariyeke mezin da hemû gelan. Divê her kes xwedî li vê pêvajoyê derkeve.”
‘Zeman zemana aştî û azadiyê ye’
Hevşaredarê Bajarê Mezin ê Wanê Abdullah Zeydan jî bal kişand ser talankirina qadên kesk ji aliyê qeyûman ve û got: “Qeyûm xirabiyeke mezin li gelê Wanê dikin. Bajarê me bajarekî afetê ye û ev park ji bo sekanîna li hemberî betonkirinê hat çêkirin û navê nivîskarê Kurd lê hat kirin. Di Kurdistana bedew de aştî kêm bû û ev jî ji aliyê Birêz Ocalan ve hat çêkirin. Ev pêvajo ji bo paşeroja hemû gelan gava yekem e. Me bi qasî pêwîst êş kişand, êdî zeman zemana aştî û azadiyê ye. Hêvîdar im ev roja bedew di serî de ji bo Birêz Ocalan û hemû girtiyên siyasî bibe roja azadiya.”
‘Qanûna ji Meclisê derbasbûyî girîng e’
Di dawiyê de Hevserokê DEM Partiyê yê Bajarê Wanê Veysî Dîlekçî axivî û bal kişand ser qanûna nû ya ji Meclisê derbasbûyî û got: “Îro em şahidiya dîrokê dikin. Di rêya ku Mehmet Uzun li paş xwe hiştî de bi hezaran Kurd li ser wêjeya Kurdî xebatan dikin. Qeyûm her derî vedihêwirînin betonê. Pêvajoyeke gelek girîng e, beriya du rojan qanûneke girîng ji meclisê derbas bû ku ked û têkoşîneke mezin di nav de heye. Piştî banga Rêberê Gelê Kurd Birêz Abdullah Ocalan Tevgera Azadiyê gav avêt. Ev qanûn girîng e lê ne bes e. Rêya siyaseta demokratîk vedike. Em ê jî li her derê rêxistin bibin û xwedî li pêvajoyê derkevin.”
Merasîma vekirinê bi stranên hunermend Serhedo û Koma Aryen bi coş bi dawî bû.
