TJA û DEM Partî li gelek taxên ku tiryak lê tên bikaranîn çalakiya konvedanê destpê kirin û bi daxuyaniyeke çapemeniyê starta wê dan. Dê ev çalaki heta heft rojan li çend taxa Conkbayirê bidome.
Tevgera Jinên Azad (TJA) û Partiya Herêmên Demokratîk (DBP) bi armanca ku li gelek taxên bajêr tiryak lê tên belavkirin û bikaranîn, li Sêrtê çalakiya konvedanê dan destpêkirin. Çalakiya ku bi daxuyaniyeke çapemeniyê dest pê kir, ji saetên serê sibê heta saetên êvarê berdewam kir. Di pêşengiya TJAyê de meşeke bi girseyî hat lidarxistin û hat diyarkirin ku ew çalakiya konvedanê dê li taxa Conkbayirê heft rojan berdewam bike.
‘Li dijî tiryakê bêdeng nemînin’
Metna daxuyaniyê jî ji aliye Hevserokê DBPa Sêrtê Emîn Dayan ve hate xwendin. Emîn Dayan diyar kir ku hûnandina qadên jiyana alternatîf û civakîkirina têkoşînê ji her demê zêdetir mecbûrî û pêwîst e û wiha axivî: “Îro em bi armanca balkişandina li ser birîneke mezin ku paşeroja civakê dixe bin xetereyê hatine cem hev. Tiryak û çetebûn êdî ne tenê ya beşekî diyar e. Di nava kolan û dibistanan de bûye gefeke mezin ku paşeroja zarokan hedef digire. Çetebûn tenê bi çek an jî bi tundiyê dernakeve holê. Ji bêkarî, xizanî, bêhêvîtî û bêedaletiya derfetan xwedî dibe. Polîtîkayên şerê taybet ên ku têne meşandin, nêzîkatiyên zayendperest, pergala perwerdehiyê ya seqet û tengasiyên aborî bi taybetî ciwan û jinan dixin nav aloziyê. Ev pirsgirêk ne tenê kesan, berxwedana civakî jî lawaz dike. Tiryak û fihûş, wekî amûrên ku pergala kapîtalîst ferz dike, tevahiya civakê dirizîne û dibe sedema parçebûnê. Em li dijî vê tarîtiyê careke din tînin ziman ku tu ciwan, jin û malbat ne tenê ne. Werin em bi hev re ciwanên xwe, taxên xwe û paşeroja xwe biparêzin. Li dijî tiryakê bêdeng nemînin. Rê nedin çetebûnê. Ji ber ku her ciwanê ku em rizgar dikin, gava herî mezin e ku ber bi paşerojê ve hatî avêtin.”
Dê çalaki sibê jî bi heman saetan bidome.
