Li Parlamentoya Tirkiyeyê liv û tevgera qanûna çarçoveyî ji duh heta îro pirr zêde bûye. AKP li Meclisê bi heyeta DEM Partî û MHPê re hevdîtin pêk anî. Tê çaverêkirin ku pêşnûmeya qanûna çarçoveyî îro ji partiyên siyasî re bê şandin û sibe jî were ber destê Serokatiya Meclisê.
Li Parlamentoya Tirkiyeyê trafîka hevdîtin û çûnehata li ser qanûna çarçoveyî ji duh ve heta niha pirr zêde bûye. Duh heta derengiya şevê hevdîtinên li ser pêşnûmeyê berdewam kir. Serokê Koma AKPê Abdullah Guler û Serokwekîlê Koma AKPê Abdulhamît Gul derbarê qanûna çarçoveyî de li Meclisê serdana DEM Partî û MHPê kir. Endamê Heyeta DEM Partî ya Îmraliyê Faîk Ozgur Erol, Cîgirê Hevserokên Giştî yên DEM Partiyê Ozturk Turkdogan, Hevberdevka HDKê Meral Daniş Beştaş û parlamentera DEM Partiyê ya Şirnexê Newroz Uysal Aslan bi heyeta AKPê re civiyan. Piştî hevdîtinê tu daxuyanî nehat dayîn.
Heyeta AKPê piştî serdan û civata li gel DEM Partiyê, bi Cîgirê Serokê Giştî yê MHPê Fetî Yildiz re hevdîtin pêk anî. Piştî hevdîtinê Fetî Yildiz diyar kir ku di navbera wan de tu pirsgirêk tune ye û li ser pêşnûmeyê lihevkirî ne û tu astengî li ser pêşnûmeyê tune ye.
Pêşnûme ji partiyên siyasî re tê şandin
Her wiha ji aliyê din ve jî tê çaverêkirin ku pêşnûmeya qanûna çarçoveyî îro ji partiyên siyasî re bê şandin û sibê jî biçe ber destê Serokatiya Meclisê. Piştre jî pêşnûme dê ji Komîsyona Edaletê ya Meclisê re bê şandin û heta roja 6ê Tebaxê li Desteya Giştî ya Meclisê bibe qanûn.
Piştî pêşnûme li Meclisê bibe qanûn dê bi îmzekirina Serokkomar bikeve meriyetê. Lê li ser dîroka ku ka dê qanûn bikeve meriyetê ne nayê zanîn.
