Hatay – Rêveberên DEM Partiyê yên Navçeya Dortyolê ku têkildarî êrişên dewleta tirk ên li ser Bakur û Rojhilatê Sûriyeyê axivîn, wiha gotin: “Hewce ye ku bi rûhê Kobanê têkoşînek bê meşandin. Heke dîsa em bi wî şiklî rabin em ê bikaribin pêşiyê li vî şerî bigirin.”
Êrişên dewleta tirk û koma wê ya paramîlîter SMOyê yên li ser gund û bajarên Bakur û Rojhilatê Sûriyeyê didomin. Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogullari û Tûncer Bakirhan di nav de nûnerên partiyên siyasî, saziyên sivîl û gelek kesan li dijî êrişên li ser Bakur û Rojhilatê Sûriyeyê û Sûriyeyê di 4ê Çileyê de li navçeya Samandag a Hatayê û li ber avahiya DEM Partiyê ya Hatayê daxuyaniyê dan û bertek nîşanî êrişan dan. Hevserokê DEM Partiyê yê Dortyolê Hidir Sîmlî û rêveberê DEM Partiyê yê Dortyolê Tûran Suzen ên tev li van daxuyaniya bûn têkildarî êrişên dewleta tirk û komên girêdayî wan ji ajansa me re axivîn.
‘Çima dinya li hemberî evqas sûcan bêdeng e?’
Hidir Sîmlî diyar kir ku dewleta tirk li Bakur û Rojhilatê Sûriyeyê şerekî qirêj dimeşîne û wiha got: “Şerê li Rojava li dijî neteweyan tê meşandin. Li Rojava kedeke vî gelî heye. Deh hezar keç û xortên kurdan bi ax bûn. Gelek ji wan birîndar bûn. Denge mirovahiyê bilind kirin.Tu mafê Tirkiyeyê nîne ku destdirêjiyê li Rojava dike. Bi balafiran, ÎHA û SÎHAyan êriş dike. Ev qas sûcan dikin, çima dinya li hemberî vê yekê bêdeng maye? Em weke partî li dijî vê zilmê ne û em ê têkoşîna xwe bidomînin.”
‘Encax ev gel dikare vî şerî bide sekinandin’
Hidir Sîmlî, anî ziman ku ji gelê kurd, tirk û ereb bigire heta hemû gelên Kurdistanê divê li dijî şerê heyî bêdeng nemînin û wiha domand: “Di sala 2014an de me ji Cizîrê bigire heta Çemê Firatê ji mirovan zincîr çêkiribûn. Heke dîsa em bi wî şiklî rabin em ê bikaribin pêşiyê li vî şerî bigirin û bibin bersiv. Encax ev gel dikare vî şerî bide sekinandin.”
‘Bi aqlekî hevpar û fikreke civakî Sûriyeyeke demokratîk dikare were avakirin’
Hidir Sîmlî, bal kişand êrişên HTŞê yên li dijî civaka Elewiyan û axaftina xwe wiha bi dawî kir: “Heke HTŞ statuya kurdan bigire ber çav û bi serok û rêveberên Elewiyan re biaxive Sûriyeyeke demokratîk dikare were avakirin. Bi aqlekî hevpar, fikreke civakî Sûriyeyeke demokratik dikare were avakirin.”
‘Divê li dijî çeteyên dewleta tirk têkoşînek bidin meşandin’
Rêveberê DEM Partiyê yê Dortyolê Tûran Suzen jî diyar kir ku dewleta tirk û komên paramîlîter ên girêdayî wê bi neyartiyeke mezin êrişî Bakur û Rojhilatê Sûriyeyê dikin û wiha got: “Li hemberî vî şerê qirêj têkoşîneke çawa dikare were meşandin? Gereke bi rûhê Kobanê têkoşînek bê meşandin. Gelê kurd û dostên wan divê li dijî êrişên dewleta tirk û çeteyên wan têkoşînekê bidin meşandin.
Divê gelê xwe sist neke, nebêje dê aştî çêbibe. Em dibînin ka di pratîkê de çi didin meşandin. Bi armanca îmhakirinê êrişan tînin ser me. Aşitî wiha nabe. Rêbazeke aştiyê jî heye. Heke ez bixwazim xwişk û biratiyê bi te re bikim divê li gorî rêbazê bimeşim. Ji aliyekê bêjin em xwişk û birayên hev in û li aliyê din gulebaran bikin, bombebaran bikin, îmha bikin. Ne aştiyeke wiha dibe ne baweriya me bi xwişk û biratiyeke wiha tê.”
