Bi pêşengiya DAKAPê û Tora Têkoşîna li Dijî Tûndiyê ya Amedê li Parka Sumerê ya Amedê derbarê Sultan Kara ku li Amedê hatibû kuştin, daxuyanî hate dayîn. Meta Sultan Kara Hamdiye Kiziltepe destnîşan kir ku ew ê heta dawiya emrê xwe dê li pey edaletê bin û anî imzn ku bila êdî jin neyên kuştin.
Bi pêşengtiya DAKAPê û Tora Têkoşîna li Dijî Tûndiyê ya Amedê li Parka Sumerê ya Amedê derbarê kuştina Sultan Kara ya ku êvara 26ê Tebaxê li taxa Şehitlikê ya navçeya Bajarê Nû ya Amedê ji aliyê kujer Ersan Akdemir ê ku di qonaxa berdanê de bû û biryara dûrxistinê li ser hebû ve hat kuştin daxuyanî dan. Aktîvîsta Tevgera Jinên Azad (TJA), Ayla Akat, Hevşaredara Bajarê Mezin a Amedê Serra Bucak, rêveberên Polîtîkayên Jinan ên şaredariyên bajarê mezin û navçeyan û nûnerên partiyên siyasî tevlî daxuyaniyê bûn. Di daxuyaniyê de pankarta ‘Kuştinên jinan polîtîk e’ hat vekirin û wêneyên Sultan Kaya û jinên ku hatine kuştin bilind kirin.
‘Ev êrîşan mafê jiyanê yê jinan dikin hedef’
Metna daxuyaniyê ji aliyê sekretera SESê ya Şaxa Amedê Îlknur Ayik ve hate xwendin. Îlknur Ayik diyar kir ku jineke din ji ber ku biryar li ser jiyana xwe da, tundî dît yan jî nexwest êdî bi mêrekî re bijî, ji aliyê wî mêrî ve ji jiyanê hat qutkirin û got: “Zarokeke din diviyabû di hembêza dayika xwe de bûbûya, bû şahidê tundiyeke hovane ya ku li dijî jiyana dayika xwe hat kirin. Ji ber vê yekê tiştên qewimîn ne tenê malbata Sultan Kara, di heman demê de em hemû birîndar kirin, kuştineke giran a jinan e ku di wijdana civakê de şopek kûr hişt. Ev êrîşên ku mafê jiyanê yê jinan dikin hedef, bi tu awayî nikarin wekî ‘meseleya malbatî, çavnebarî, nîqaşa demkî’ werin ravekirin û rewakirin. Kuştinên jinan, şêwaza herî giran a tundiya mêr e ku li dijî îradeya jinan a gotin û biryarê ya li ser jiyana xwe tê kirin.”
‘Em ê bibin şopdarên vê komkujiyê’
Îlknur Ayik anî ziman ku bi kuştina Sultan Kara re careke din hate fêmkirin ku divê mekanîzmên parastina mafê jiyanê yê jinan werin xurtkirin û wiha domand: “Pêwîst e li dijî faîlên tundiyê têkoşîneke hiqûqî ya bandor û rêgirtinê bê meşandin, rê neyê dayîn ku bêcezahiştin çêbibe û daxwazên parastinê yên jinan bi cidiyet bên girtin. Em ê destûrê nedin ku jiyana Sultan Kara veguhere îstatîstîkê. Em ê bibin şopdarên vê komkujiyê. Em daxwaz dikin ku pêvajoya lêpirsîn û darizandinê bi awayekî bandor, şefaf û bi baldarî bimeşîne, faîl cezayê ku heq dike bigire. Îro xwestina edaletê ji bo Sultan Kara, di heman demê de xwestina edaletê ye ji bo hemû jinên ku mafê wan ê jiyanê di bin xeteriyê de ye. Em ê Sultan Kara ji bîr nekin, em ê nedin jibîrkirin. Heta ku kuştinên jinan biqedin, em ê bêdeng nemînin.”
‘Em bi hev re têbikoşin’
Meta Sultan Kara, Hamdiye Kiziltepe diyar kir ku ji aliyên meran ve tên tehdîtkirin û kuştin û wiha axivî: “Em edaletê dixwazin. Heta dawiya emrê xwe em ê li pey edaletê bin. Bila jin neyên kuştin. Em bi hev re têbikoşin.”
‘Heta ku em jiyaneke wekhev û azad ava bikin em ê têbikoşîna xwe bidomînin’
Piştre aktivîsta TJAyê Ayla Akat Ata axivî û destnîşan kir ku soz dikin dayikan ji bo sûcdar ên cezakirin em ê têbikoşin û wiha pê de çû: “Bila qadên ku jin lê werin parastin bên avakirin. Qanûn wekî ku divê nayên cîbicîkirin. Jin divê bên cem hev û bibin welatê hev. Bila dev ji polîtîkayên ku jinan di nav çar dîwaran de digirin berdin. Sîstema ku kesayeta wê di nava sîstema serdest a mêr de teşe digire, jinan dikuje. Gelo jinên li vî welatî wê bi vî rengî bên parastin? Li vê erdnîgariya ku tundiya li ser jinan lê zêde ye, jinên ku li ber xwe didin hene. Li vê erdnîgariyê ji ber gotina; ‘Kuştinên jinan polîtîk in’ doz hat vekirin. Lê belê kêmkirina cezayê li mêr hat kirin. Kesên ku jin dikujin hatin berdan. Zîhniyeta ku canekî ji yarê wê qut dike, piştî 3 sal û nîvan çawa dê li nava me bigere? Li Êlihê tundiya li ser jinan zêde bû, bi têkoşîna ku hat dayîn ev kêm bû. Em ê li dijî vê pergalê her dem û li her derê têbikoşin. Heta ku em jiyaneke wekhev û azad ava bikin em ê têbikoşina xwe bidmînin.”
Daxuyanî bi berzkirina dirûşmeyên ‘Jin, jiyan, azadî’ û ‘Kuştinên jinan polîtîk in’ bi dawî bû.
