Wan – Kurtefîlma derhênera Kurd Xecê Rêdûr a bi navê “Zar û Zemar” ku fîlma ewil a derhêner e û li ser mijara mafên mirovan disekine, di du mihrîcanan de xelat wergirt.
Kurtefîlma nivîskar û derhênera Kurd Xecê Rêdûr a bi navê “Zar û Zemar” ku li ser mijara mafên mirovan disekine, di du mihrîcanan de xelat wergirt. Ewilî di beşa “Mafên Mirovan” a Mihrîcana Kurtefîlman a Soeûl 2024 a Koreya Başûr de xelata zîv wergirt. Herî dawî di beşa şer a Mîhrîcana Navneteweyî ya Fîlman a HECare 2025 a Canadayê de weke fîlma herî baş hat hilbijartin û xelat wergirt. “Zar û Zemar” li rojhilatê Kurdistanê hatiye kişandin û çêkerê kurtefîlmê Mihemed Bozan e.
‘Ji ber kêmasiyên teknîkî em nikarin bêtir fîlmên serkeftî çêkin’
Derhênera kurtefîlmê Xecê Rêdûr ku hestên xwe vegotin, anî ziman ku kişandina “Zar û Zemar” 2 sal girtiye. Xecê Rêdûr da zanîn ku wan di pêvajoya kişandina fîlm de gelek zehmetî kişandine û got: “Ji ber ku ji aliyê lîstîkvaniyê de derfetên me nebûn, em mal bi mal digeriyan û me ji xwe re lîstikvan ditîtin. Her wiha sînemageriya Kurdan hêj nebûye kom, tîm û teknîka me pêş neketiye, em di kişandina fîlman de gelek zehmetiyan dibînin.Lewma ji bo civaka Kurdistanê em nikarin bêtir fîlmên baş û serkeftî çêkin.”
‘Dema ez bi zimanê xwe karekî dikim pir kêfxweş dibim’
Xecê Rêdûr bi bîr xist ku gelê Kurd ji aliyê pergal û desthilatên dewletan ve bi polîtîkayên tunekirinê re rû bi rû dimîne û diyar kir ku hê jî hebûna Kurdan tê înkarkirin. Xecê Rêdûr bi lêv kir ku ji ber van sedeman dema ew bi zimanê Kurdî karekî dikin gelek kêfxweş dibe û wiha got: “Dema em zimanê xwe, civaka xwe, eslê xwe, çanda xwe û mafên xwe bi rêya sînemayê nîşan didin û ji cîhanê re didin nasandin, ez gelekî dilşad dibim. Ji bo me tiştê herî girîng parastina nirxên Kurdan e û em ê heta dawiyê jî li ser vê esasê bin.”
