Komên hilberînê yên Komunên Navendên Jiyanê yên Jinan ên li Amedê hatin bahev. Jinên ku di civînê de axivîn, destnîşan kirin ku modela aboriya hevpar jiyana komunal, çanda hevgirtinê pêş dixe û diyar kirin ku beşdariya wekhev a di pêvajoyên biryargirtinê de di jiyana wan de guherîneke berbiçav afirandiye.
Komên hilberînê yên Komunên Navendên Jiyanê yên Jinan ên girêdayî Gerînendetiya Polîtîkayên Jinan a Şaredariya Peyasê û Serokatiya Daîreya Polîtîkayên Jinan a Şaredariya Bajarê Mezin a Amedê, li Parka 75an a navçeya Peyasê ya Amedê di civînekê de li hev kom bûn. Di civîna ku jinan serpêhatiyên xwe parve kirin de bal hat kişandin ser girîngiya modela hilberîna komunal û xurtbûna aboriya jinan.
‘Em wekî komekê difikirin û hildiberînin’
Di civînê de jinan diyar kirin ku beşdariya wekhev a di pêvajoyên biryargirtinê de di jiyana wan de guherîneke berbiçav afirandiye û wekî alternatîfeke domdar û bi bandor derketiye pêş. Rêvebera Gerînendetiya Polîtîkayên Jinan a ku di civînê de axivî, bal kişand ser hêza keda hevpar û wiha got: “Dema ku em ked, zanîn û serpêhatiyên xwe digihînin hev, em ne tenê ji aliyekî ve xurt dibin, lê her wiha em nêzîktirî hev dibin. Em êdî ne wekî kesên bi tenê, lê wekî komekê difikirin û hildiberînin.”
Ji bo pirsgirêkan çareseriyên komî
Jinan di civînê de, zehmetiyên ku di pêvajoyên hilberînê de derdikevin holê û rêbazên çareseriyê yên li ser bingeha tecrûbeyên jinan jî nîqaşkirin. Jinan di nava xwe de danûstandineke xurt a zanîn û tecrûbeyan pêk anîn. Jinan destnîşan kirin ku civînên bi vî rengî, hem ji aliyê tekakesî û hem jî ji aliyê civakî ve jinan bi hev re girê dide û beşdariya wan a di qada giştî de xurttir dike.
Aboriya hevpar bingeha jiyana azad e
Beşdaran anîn ziman ku aboriya hevpar di avakirina jiyaneke demokratîk, ekolojîk û azad de roleke sereke dilîze. Hat destnîşankirin ku ev modela ku ji aliyê jinan ve hatiye afirandin, ne tenê aboriyê, di heman demê de jiyana komunal, hevgirtin û azadiya jinan jî diparêze.
Civîn, bi biryara xurtkirina torên hevgirtinê û berfirehkirina qadên xebatên hevpar bi dawî bû. Ev kombûnê careke din nîşan da ku jin bi rêxistinbûn û hilberîna xwe ya komî, ber bi avakirina jiyaneke wekhev û komunal ve gavan diavêjin.
