Serokwekîla Koma DEM Partiyê Gulistan Kiliç Koçyîgît diyar kir ku ji bo çareseriya pirsgirêka Kurd divê çarçoveyeke qanûnî çêbibe û Meclis tavilê înîsiyatîfê li xwe bigire. Koçyîgît banga azadkirina Abdullah Ocalan kir.
Serokwekîla Koma Partiya Wekhevî û Demokrasiyê ya Gelan (DEM Partî) Gulistan Kiliç Koçyîgît têkildarî geşedanên di rojevê de li Meclisê daxuyanî da. Gulistan Kiliç Koçyîgît destpêkê bal kişand ser şewata li Kartalkaya ya Boluyê û got ku berpirsyarê vê şewatê desthilat e.
‘Divê Meclis tavilê înîsiyatîfê li xwe bigire’
Gulistan Kiliç Koçyîgît bal kişand ser nîqaşên têkildarî çareseriya pirsgirêka Kurd û da zanîn ku Rêberê PKKê Abdullah Ocalan pêvajoyê weke “şens” dibîne û wiha got: “Divê bi rastî jî îcar ev şens ji dest neçe. Di vê çarçoveyê de divê hikûmet ji gotin û pratîkên dê bibin sedema jidestçûna vî şensî dûr bisekine. Divê gavên erênî biavêje. Eşkereye ku ev pêvajo bi hatin û çûnan nameşe. Lewma jî bi taybet jî divê Meclis ji bo çarçoveyeke qanûnî tavilê înîsiyatîfê li xwe bigire.”
‘Divê birêz Ocalan azad bibe’
Gulistan Kiliç Koçyîgît bi bîr xist ku tecrîda li ser Abdullah Ocalan didome û got: “Ji bo birêz Ocalan bikare rola xwe bilîze, ji bo ev derfeta çareseriya demokratîk ji dest neçe, divê mercên xebatê yên birêz Ocalan bên başkirin, tecrîd rabe û ji bo ewlehî û azadiya wî gav bên avêtin.”
‘Em ê nexşerêyê nîqaş bikin’
Gulistan Kiliç Koçyîgît di berdewama axaftina xwe de wiha got: “Ev meseleye di heman demê de meseleya demokratîkbûna Tirkiyeyê ye. Meseleya 85 milyon kesên li vî welatî dijîn e. Em dixwazin hemû partiyên siyasî yên li Meclisê û derdorên civakî piştgiriyê bidin pêvajoyê. Desteya me ya navendî îro dicive. Dê li gorî daxuyaniyên şandeya me, li ser nexşerêyê nîqaş were kirin û em ê çendek biryaran bidin.”
Nerazîbûna li dijî girtina parêzer Firat Epozdemîr
Gulistan Kiliç Koçyîgît bertek nîşanî girtina parêzer Firat Epozdemîr da û axaftina xwe wiha bi dawî kir: “Ev jî besî wan nekir ku îcar jî dixwazin li dijî Baroya Stenbolê operasyonê bikin. Herî dawî lêpirsîn dan destpêkirin. Der heqê qetilkirina 2 rojnamegeran a li Rojava daxuyanî dane lewma lêpirsîn dane destpêkirin. Di çarçoveya lêpirsînê de jî parêzer Firat Epozdemîr hate binçavkirin û girtin. Ne delîlek heye ne jî sedemeke hiqûqî. Tenê armanc dikin ku Baroya Stenbolê krîmînalîze bikin. Li ber baroyê kompas danîne.”
