Wan – Welatijê Wanî yê ke derheqê qanûnê çarçewa yê ‘Xurtkerdişê paştîdayîşê neteweyî û yewbîyayîşê komelî’ de qisey kerdî, bale ante serê babeta têduştî û azadîye û waşt ke verê Rayberê Şarê Kurdî Abdullah Ocalan û heme girewteyê sîyasî bêrê veradayene.
Bi vengdayîşê Rayberê Şarê Kurdî Abdullah Ocalanî yê 27ê sibata 2025 de Kurdîstan û Tirkîya de prosesê ‘Aştî û Komelê Demokratîk’ dest pê kerd. Prosesê qanûnê çarçewa yê ‘Xurtkerdişê paştîdayîşê neteweyî û yewbîyayîşê komelî’ 5ê tebaxe de bi 367 îmzayanê parlamenteran Serekîya Meclîsî rê amebi erşawitene û Komîsyonê Edaletî ra zî derbas bi. Yeno paweno ke 11ê tebaxe de qanûn meclîs de bêro tesdîqkerdene.
Welatijê Wanî yê ke derheqê qanûnî de cewab daye persanê ajansê ma,bale ante muhtewaya qanûnî ser û dîyar kerdî ke ganî qanûn de cîyayîye çin bo. Welatijan ard ziwan ke ganî verê Rayberê Şarê Kurdî Abdullah Ocalan, heme girewteyê sîyasî çarçewa nê qanûnî de bêrê veradayene û agêrê mîyanê şarê xo.
Welatijan dîyarkerd ke, her çend qanûn amebi pêşkêşkerdene zî hîna bawerîya înan bi dewlete nîna û waşt ke no qanûn pratîk de zî bêro caardiş.
Reyna welatijan waşt ke êdî têduştî û azadî bêro welat û polîtîkaya qeyûman zî bêrê qedênayene.
