Stenbol – Hemwelatîyê Stenbolî prosesî û qanûnê çarçewa ser o qisey kerd û wina vat: “Heta Serekê ma nêro veradayene berê hepisxaneyan anêbenê. Waştena pêro şarê Kurdî azadîya Serek Abdullah Ocalanî ya.”
Serê vengdayîşê Rayberê Şarê Kurdî Abdullah Ocalanî yê 27ê sibate ra nêzdîyê 2 serrî vîyart û bi vengdayîşê Rayberê Şarê Kurdî Abdullah Ocalanî prosesê “Aştî û Komelê Demokratîkî” dest pêkerd. 5ê tebaxe de ‘Qanûnê Çarçewa’ yo ke 12 madeyan ra ware yeno, erşawîya meclîsî û 8ê aşme de Komîsyonê Edaletî yê Meclîsî ra vîyart bî.
Tewr peynî de çarçewaya prosesî de qanûnê çarçewa yo ke bi nameyê ‘Xurtkerdişê piştîdayîşê neteweyî û yewbîyayîşê komelkî’ 5ê tebaxe de bi 367 îmzayanê parlamenteran erşawîyabi Serekîya Meclîsî. 12 madeyê qanûnê çarçewa badê munaqeşeyan Heyetê Pêroyî yê Meclîsî de, bi rayê 467 parlamenteran ame qebûlkerdene. Bi qebûlkerdişê nê qanûnî prosesê “Aştî û Komelê Demokratîkî” derbazî qonaxêko newe bî. Badê qanûnê çarçewa komel de munaqeşeyê prosesî germêr bîyî. Şarê kurdî qanûnê çarçewa de zaf kêmanîyan vîneno la seba destpêkê vetîşê qanûnan pozîtîf vîneno. Şarê kurdî qanûnê çarçewa sey “akerdişê berê aştîye” pênase keno.
‘Gama tewr muhîme azadîya Serekî ya’
Hemwelatîyê kurdî yê ke Îstenbol de ciwîyenê, derheqê proseso ke esto û qanûnê çarçewa de seba ajansê ma qisey kerd. Hemwelatîyan dîyar kerd ke heta Serekê înan nêro veradayene berê hepisxaneyan anêbenê û ê zî bi dewlete bawer nêbenê. Hemwelatîyan ard ziwan ke waştişê pêro şarê Kurdî yewo, o zî azadîya Abdullah Ocalanî ya. Hemwelatîyan veng da dewlete û dîyar kerd ke proses de gama tewr muhîm e azadîya Rayberê nînan a û wina vat: “Gerek bilez Serekê ma azad bibo û pêro heqê kurdan bêrê dayene.”
