Amed – Şarê Amedî derheqê “Qanûnê Çarçewa” de waşt ke girewteyê sîyasî bêrê veradayene, aştî virazîyo û dîyar kerd ke tena vetişê qanûnî nêbeno, ganî gamî bêrê eştene.
Prosesê “Aştî û Komelê Demokratîkî” ke Rayberê Şarê Kurdî Abdullah Ocalanî 27ê sibate 2025 de dabî destpêkerdene, dewam keno. Çarçewa prosesî de 5ê tebaxe de “Qanûnê Çarçewa” yo ke 12 madeyan ra yeno pê, erşawîya Meclîsî. Qanûn 8ê tebaxe de Komîsyonê Edaletî yê Meclîsî ra vîyart û tewr peynî 10ê tebaxe de bi tesdîqkerdişê 467 parlamenteran Meclîsê Pêroyî de ame qebulkerdene. Bi qebulkerdişê nê qanûnî, prosesê “Aştî û Komelê Demokratîk” vîyart qonaxêko newe. Şarê Amedî derheqê “Qanûnê Çarçewa” de ajansê ma rê qisey kerd.
‘Nê 50 serran de nê şerî de bi qatrilyonan pere şî’
Welatijo bi nameyê Kutbettîn Sonsûzî derheqê partîyanê ke seba “Qanûnê çarçewa” raydayîş de ney dayê de wina vat: “ÎYÎ Partî xo ra nêwazena aramî bêro Tirkîya. Vetişê nê qanûnan seba ma firsendêko. Nê 50 serran de nê şerî de bi qatrilyonan pere şî. Eke no şer nêbîne, no pere do budçeya Tirkîya de bimendêne.”
‘ÎYÎ Partî û Zafer Partî nêwazenê aştî virazîyo’
Welatijo bi nameyê Mehmet Zûlfî derheqê kesanê ke seba sedemanê sîyasî şîyê teberê welatî ser qisey kerd û nê çîyî ardî ziwan: “Ma pêro qayîlê aştî yê, wa merdimî nêmirê. Ma wazenê ke ey merdimê ke şîyê teberê welatî agêrê. Qanûn de vanê kesê ke tewrê şerî bîyê nêeşkenê qanûn ra îstîfade bikerê, gelo kam zano kam tewrê şerî bîyo? ÎYÎ Partî neyarê kurdan a. Merdimî wazenê aştî pê bêro la ÎYÎ Partî û Zafer Partî nêwazenê aştî virazîyo.”
Welatijo bi nameyê Refîk Okmanî zî bal ant rewşa zindanan ser û wina qisey kerd: “Ganî kesê ke zindanan de yê bêrê veradayene. Tena qanûnî vejîyê û game nêro eştene nêbeno. Waştişê ma o yo ke girewteyê siyasî bêrê veradayene.”
‘Eke ma bibê yew, do her çî virazîyo’
Welatijo bi nameyê Selahattîn Kiliçaslanî zî bal ant yewbîyayîşê şarê kurdî ser û wina vat: “Qanûn Meclîs ra vîyart la gerek ma zî bibê yew. Eke ma bibê yew, do her çîyî bi xo bibo.”
‘Ganî Dewleta Tirkîya zî destê xo bikero binê kereyî’
Welatijo bi nameyê Giyasettîn Kiliçî zî hêvî û bêbawerîya xo ya derheqê prosesî de ard ziwan û wina vat: “Nê 2 serran de prosesê aştî dest pê kerdo la hetê Dewleta Tirkîya ra fikarê ma estê. La ma nê prosesî ra bawer kenê û destek danê ci. Se ra 95ê şarî destek danê nê prosesî û wazenê aştî bibo. Gerek Dewleta Tirkîya zî destê xo bikero binê kereyî û qanûno bingeyî xo bivurno.”
Welatijo bi nameyê Mehmet Turanî zî seba girewteyanê sîyasîyan waştişê azadîye kerd û va ke ganî girewteyî demildest bêrê veradayene. Dayîka ke nêwaşt nameyê xo bido zî wina vat: “Ma pêro wazenê ke no qanûn bêro caardene. Wa weşîye bibo, wa merdimî nêrê kiştene. Ma heqîye wazenê. Ma seba Serekê xo her çîyî xeyrî wazenê. Ma way û birayê yewbînan ê. Ma awankerdiş û weşîye û rindîye wazenê.”
