Amed – Îmzekerê Deklarasyonê “1001 îmze seba komara demokratîk û aştîye” û Serekê Komela Şêx Seîdî Kasim Firatî derheqê prosesê Aştî û Komelê Demokratîkî de qisey kerd û va: “Nêbeno ke Abdullah Ocalan şertanê tecrîdî de bo û prosesê aştîye bêro rayraberdene.”
Bi pêşengîya cinî, ronşvîr, hunermend û akademîsyenan 12ê êlule de Îstanbul de deklarasyonê “1001 Îmzeyî Seba Komara Demokratîk û Aştîye” ame îlankerdene. Deklarasyon bi amancê ke hêz bido Prosesê Aştî û Komelê Demokratîkî ame îlankerdene û bi seyan kesî piştî daye nê deklarasyonî. Îmzekeranê deklarasyonî ra yew zî tornê Şêx Seîdî û Serekê Komela Şêx Seîdî Kasim Firat o. Kasim Firatî derheqê prosesê aştî û komelê demokratîkî de ajansê ma rê qisey kerd.
Kasim Firatî bale ante piştîdayîşê şarî yê seba aştîye ser o û wina vat: “Raşta zî aştî û demokrasî di konseptê xeylî rind ê la eke demokrasîye bi hawayêko huquqî bêro awankerdene, çîyêko zaf baş o û aştîye zî fermanêko îlahî yo. Ez bawer kena ke komelê kurdan ra %90 aştîye wazeno û demokrasîye zî zaf baş vîneno.”
‘Ganî dewlete mewzûyanê ke dewrê şerî de qewimîyayê, bîyaro rojeve’
Kasim Firatî dewamîya qiseykerdişê xo de aştîyêka domdare ser o va ke ganî dewlete mewzû û sebebanê ke dewrê şerî de qewimîyayê, bîyaro rojeve û wina va:
“100 serrî yo ke şer est o, kiştiş est o, xirabkerdişê malxirabî est a û bêedaletî est a. Şer bi tu hawayî nêqedîyayo. Çîyo ke nê prosesî de yeno waştene, no yo: Wexto ke demokrasîye, azadîye, heq û edalet bêrê awankerdene, o wext aştîyêka domdare eşkena bêra caardene.
%90ê merdiman vanê ke aştî baş a û ma piştî danê la vatişê sey ‘ma do terorî pak bikerê’ seba mi zelal nîyê. Teror pak kerdene çi mana dana? Ti seba çi wazenî aştîye awan bikerî? Nê kesan seba çi şer kerdo? Eke tu sebeb û bingeyê no çî nêrê rojeve û înan ser o munaqeşeyî nêrê kerdene, aştî do senî bêro caardene?”
‘Problemê şarê kurdî tirkan reyde nîyo, sîstemê Komara Tirkîya reyde yo’
Kasim Firatî bale ante nê çîyî ser o ke goreyê ey problemê şarê kurdî şarê tirkî reyde nêy; bi sîstemê Komara Tirkîya reyde yo. Ê qiseykerdişê xo wina domna: “Roja ke Komara Tirkîya ameya awankerdene ra heta ewro, şer dewam kerdo. Dêrsim de, Geliyê Zîlanî de û Agirî de, kesê ke sereyê xo nêtewnayê û vatî ‘ma Kurd ê’, ameyê hedefgirewtene. Serra 1925î ra heta ewro, kurdî şaristanan de, koyan ser o, koçberîye de û xeylî cayan de vera na rewşe serewedaritiş kerdo. Ewro zî na rewşe dewam kena. Netîceye de çareserîyêk nêamaya vînayene. Semedê nê çî ma vanê: wa aştîye bêro caardene. Se serrî yo ke nê sîstemî bi no hawa çîyek bidest nêkerdo û ma zî çok nêronayo. Bêrê destê xo bidinê yewbînan. Eke fedakarîyêk bikewo milê ma ser o, ma amade yê ke bikerê. Ma wazenê aştîyêka domdare bêra caardene û bingeyê edaletî bêro awankerdene. Wa her kes no çî baş bizano: Kurd û Kurdîstan her çî ra pîlêr ê û ganî her kes hesabê nê çî bikero. Çîyêko bîn zî est o: Problem mabenê kurdan û tirkan nîyo. Kurdî dişmenîya şarê tirkî nêkenê. Kurdî vera sîstemê Komara Tirkîya de şer kenê. Ma vera nê sîstemî ke 100 serrî verê cû hetê hêzanê îşxalkerdeyan ra ameyo awankerdene de, şer kenê.”
‘Sey endamêk komeleya Şêx Seîdî ma seba aştîyêk domdare hedre yê’
Kasim Firatî qiseykerdena xo de bale ante heqanê şarê kurdan ser o, ê sey heqê ziwan, nasname, kultur û edaletî û va:”Kurdan seba ke va ‘ma Kurd ê’, ameyê kiştene. Heta problemê şarê kurdî nêro çareserkerdene, çareserîyêka raşten nêna caardene. Heta heqê ziwan, nasname, kultur û edaletî nêro garantîkerdene, aştîye bi ca nêyena. Sewbîna ganî efêko sîyasî bêro vetene. Bi hezaran kurdî semedê ke vatî ‘ma Kurd ê û ma est ê’ ameyê girewtene û bi hezaran kurdî zî welatê xo koçber bîyê û teber de cuyenê. Hetêk ra ma nê heq û waştişan wazenê, hetê bîn ra zî yeno vatene ‘ma do terorî pak bikerê’. No ziwan, ziwanê çareserîye nîyo. Eke ferasetê înan no bo, no proses eşkeno 3-4 serran dewam bikero û rewşe xirabêr biba. Eke rewşe xirabêr biba, beno ke felaketê pîlî bêrê meydan. Ma ewro, sey endamanê komeleya Şêx Seîdî, vanê ke ma seba aştîye amade yê. Wa ê destê xo ver bi ma wa derg bikerê, ma zî do destê xo ver bi aştîye ya derg bikerê.”
‘Ganî Abdullah Ocalan bieşko heme hetanê sîyasî reyde têkilî de bo’
Kasim Firatî peynîya qiseykerdena xo de va ke ganî Abdullah Ocalan bieşko bi heme hetanê sîyasî û komelkî rê têkilî de bibo. Ê qiseykerdena xo wina qedêna:”Ganî ma goş bidê kesanê ke komelî de wayîrê rûmet û tesîr ê. Ganî pêkerdiş û nêzdîbîyayîşê bi şarê kurdan rê bêro qebulkerdene. Serran o xeylî bedêlî ameyê dayene. Ganî dewlete û PKK goş bidê vatiş û waştişanê heme hetanê komelî û goreyê înan qerar bidê. Ganî firsend bêro dayene ke kesê cîya bieşkê şêrê Îmralî û Abdullah Ocalanî reyde pêvînayîş bikerê. Eke no firsend nêro dayene, dorûverê Îmralî bêro dorpêçkerdene, aqilmend û kesanê bandordar ê kurdan bêrê astengkerdene û mabenê hetanê cîyayan de dayîşûgiretiş nêbo, no proses nêeşkena serbikewo. Ma nê çî vanê: çiqas zehmet bo zî, aştîye çîyêko zaf muhîm o û qîmetin o. Aştîyêka bi rûmet, ke merdim bieşko bi rayîrê aye cuyayîşêko hempar awan bikero, bixo meziyetêko gird o. Wa her çîyo ke keweno milê her kesî ser bêro kerdene.”
