Hemserekê Konseyê Rayberîya KCK’yî Cemîl Bayik bale ante rolê bingeyîn ê komelî ser o û dîyar kerd ke çareserîye tena destê dewlete de nîya. Bayikî ard ziwan ke ganî şar gamanê dewlete nepawo; eks nê çîyî, bi hêza xo ya rêxistinbîyayîşê komînal û têkoşînê demokratîk ê komelkî wayîrê îradeya xo vejîyo.
Beşo dîyin yê roportajê ANF’yî bi Hemserekê Konseyê Rayberîya KCK’yî Cemîl Bayik rê kerde, ame weşanayene. Bayikî roportajî de bale ante nêzdîbîyayîşê dewlete yê vera prosesî ser û dîyar kerd ke Prosesê Aştîye û Komelê Demokratîk qonaxa nikayîne de bi astengî û tehdîtanê giran rê rî bi rî yo. Bayikî vat ke gamê ke heta nika seba çareserîye ameyê eştene, bese nêkenê û dîyar kerd ke seba ke proses bi hawayêko weş averşoro, ganî gamê sîyasî û huqûqî yê şênberî bêrê eştene.
‘Qanûn rayberan teber de verdano, prosesî de têmîyanekî vejeno’
Bayikî qanûnanê nikayînan yê ke seba prosesî ameyê viraştene rexne kerd û vat ke nê qanûnî probleman çareser nêkenê, eks înan xorîn kenê. Bayikî ard ziwan ke no nêzdîbîyayîş endamanê rêxistine kategorîze keno û hûmarêka muhîm ê kadroyan teberî çarçewaya qanûnî de verdano, prosesî keno tehluke. Bayikî na rewşe sey “tîya de nanê linga xo” pênase kerd û dîyar kerd ke heta bi ewnîyayîşêko demokratîk û biedalet nêzdî babete nêbê, problemê ke tede xetimênê do timûtim dewam bikerê.
‘Demokratîkbîyayîş û çareserîya problemê kurdan sey goşt û nenûg ê’
Dewamê qiseykerdena xo de, Bayikî bale ante muhîmîya demokratîkbîyayîşê pêroyî ser o û dîyar kerd ke çareserîya problemê kurdan û demokratîkbîyayîşê Tirkîya yewbînan ra cîya nîyê. Bayikî îfade kerd ke heta înkarê nasname û heqanê bingeyîn ê şarê kurdî ser o dewam bikero, awankerdena cuyayîşêka aram û demokratîk Tirkîya de mumkin nîya. Bayikî vengdayîşê pêro hêzanê demokratîk, roşnvîran û hetanê sosyalîstan kerd ke seba çareserîye, zêdeyîr berpirsîyarîye bigêrê û wayîrê nê prosesê tarîxî vejîyê.
‘Ganî Rayber Apo raya pêroyî reyde bêro têhet’
Derheqê spekulasyon, xeberê zureyînê û provokasyonê ke hepîsxaneyê Îmralî ser o yenê kerdene de, Bayikî vat ke nê kayî hetê derûdoranê ke newazenê probelmê kurdan çareser bibê ra yenê organîzekerdene. Bayikî dîyar kerd ke seba vernîgirewtena nê provokasyonan û roşnkerdena raştîyan, ganî fersend bêro dayene ke Rayber Apo bi hawayêko azad bi temsîlkaranê sazgehanê sîvîl, rojnamegeran û raya pêroyî reyde raşteraşt dîdaran ca bîyaro.
‘Ganî şar paweyê dewlete memano, bi rêxistinbîyayîşê komînal çareserîye bîyaro’
Peynîya erjnayîşanê xo de, Cemîl Bayikî bale ante rolê bingeyîn ê komelî ser û dîyar kerd ke çareserî tena destê dewlete de nîya. Bayikî ard ziwan ke ganî şar gamanê dewlete nêpawo; eks nê çîyî, bi hêza xo ya rêxistinbîyayîşê komînal û têkoşînê demokratîk ê komelkî wayîrê îradeya xo vejîyo. Bayikî îfade kerd ke bi yewîye û xorêxistinbîyayîşê şarî, do heme astengî bêrê şikênayene û proses bireso netîceyêko serkewte.
