Serekê Komela Pêkerdişê Komelkî Mahmût Şîmşekî waşt ke dewlet seba heqanê heme şarê kurdan qanûnan virazo û dîyar kerd ke ê sey komele piştîdayîşa seyyewbênî, demokrasî û edaletî kenê.
Komela Pêkerdişê Komelkî derheqê dewrê newe yê viraştişê qanûnan ê meclîsî de, awanîya komele ya Taxa Alîpaşayî ya qezaya Sûrî ya Amedî de eşkerayîyêk da çapemenîye. Serekê Komela Pêkerdişê Komelkî Mahmut Şîmşekî eşkerayî wend û bale ante Prosesê Aştî û Komelê Demokratîkî ser o.
Mahmût Şîmşekî va firsendo ke seba aştîye virazîyayo zaf muhîm o û wina qisey kerd: “Meclîs dest bi karê xo keno. Vîyarte de xebata ke demokrasî û aştîye ser o ca ardî zaf muhîm ê. No firsend, firsendêko muhîm o, ganî nêro peygoşkerdiş.”
Mahmût Şîmşekî şerê çekdarî yê mabenê PKK’yî û Tirkîya ard vîr û qiseykerdişê xo wina domna: “Ma hêvîdarê ke; kaosêko gonî ya çewres û çend serran o ke dewam kena, bivurîyo hawîrdorêk aştîye ya demokratîk. Ma hêvî kenê ke; badê qonaxa bêçekkerdişî, gamê zaf muhîm ê ke programê ke bîyê qanûn de, bê ke bêrê peygoşkerdiş, bêrê caardiş. Bi no hawa, nîşaneyê rayîrê demokrasî û aştîye ganî mîyanê koman de bibê sebebê resayîşa tesdîqkerdişî, seyyewbînîye, birayîye û normalbîyayîşî. Ganî Meclîsê Tirkîya, bi pêkerdişê sîyasî yo ke resaya aye, endî pratîkî de zî welatî û dinya de demokratbîyayîşê xo yê raştên îspat bikero.”
Mahmût Şîmşekî tewr peyên va ke ganî dewlete bê qanûnanê seba bêçekkerdişî, gaman seba heme heqanê kurdan bierzo û qiseykerdişê xo wina qedêna: “Ganî dewlete tena seba PKK’yî nêy, seba heqanê heme şarê kurdan zî qanûnan virazo. Ma sey komele piştîdayîş danê her tewir gamanê seyyewbînî, demokrasî û edaletî.”
