Sazgehanê elewîyan vera sereştişê polîsan yê Halk TV’yî, tayînkerdişê qayûmî û vindarnayîşê weşanî pîya reaksîyon mojna. Sazgehan dîyar kerd ke sereştiş vera azadîya çapemenî û agahdarîye heqê şarî yê agahîgirewtişî kenê hedef û venga qedênayîşê pratîkanê qayûman, qerarê vindarnayîşê weşanî û tedayanê ser rojnamegeran da.
Federasyonê Elewî û Bektaşîyan (ABF), Konfederasyonê Yewîyanê Elewîyanê Ewropa (AABK), Weqfê Kultur û Hunerî yê Hacî Bektaş Velî yê Anatolîya (HBVAKV), Federasyonê Elewîyanê Tirkîya, Komeleyê Kulturî yê Elewîyan (AKD), Komeleya Kultur û Hunerî ya Pîr Sultan Abdalî (PSAKD) û Federasyonê Elewî û Bektaşîyan yê Avustralya derheqê sereştişê polîsan yê Halk TV û tayînkerdişê qayûmî de eşkerayîyêka hempare ya nuştekî daye.
Eşkerayîye de ke bi sernameyê “Azadîya Çapemenîye Azadîya Şarî ya” ame weşanayene, ame vatene ke hêrişê vera Halk TV’yî reyna tehdîdanê vera azadîya çapemenî û agahdarîye yê Tirkîya mojneno. Ame qetîkerdene ke mesele tena Halk TV’yî ra sînordar nîya; bale ameye antene qerarê vindarnayîşê weşanî, cezayê îdarî yê vera kanalanê televîzyonî û astengkerdişê keyepelanê xeberan û hesabanê medyaya komelkîye ser o. Eşkerayîye de wina ame vatene: “Wexto ke rojnamegerêk yeno bêvengkerdene, şar yeno bêvengkerdene. Wexto ke kanalêk televîzyonî yeno bêvengkerdene, heqê agahîgirewtişî yê milyonan kesan yeno astengkerdene.”
‘Seba ke ma elewî yê, ma rind zanenê ke teda û sansur çi mana de yê’
Sazgehanê elewîyan bale ante tedayan, qedexeyan û sansurî ser o ke elewî tarîx de înan reyde rîbirî mendê: “Sey elewîyan ma tarîxê xo yê dergî de rind zanenê ke teda, sansur, qedexe û bêvengkerdişo ke bi destê dewlete beno, çi mana dano.” Sazgehan dîyar kerd ke kam bibo hedef bibo, ê vera her tewir sansur, pratîkê qayûman û sînordarkerdişê azadîya agahdarîye yê.
‘Ma Tirkîyayêka demokratîk û laîk wazenê’
Sazgehan dîyar kerd ke kenarê çapemenîya azade, azadîya fikrî û agahdarîye de yê: “Ma Tirkîyayêka demokratîk û laîk wazenê ke tede rojnamegerî, kamcîn fikrê înan yê sîyasî bibo zî, bi azadî bixebitîyê; tu kanal bi tedaya sîyasî bêveng nêbo û tu hemwelatij semedê fikranê xo ceza nêbo.” Sazgehan waşt ke rojnamegerî bêrê azadkerdene, tedayê sîyasî û îdarî yê ser çapemenîye bêrê wedarnayene û pratîkê qayûman û vindarnayîşê weşanan biqedîyê. Sazgehan peynî de wina vat: “Ewro eke Halk TV bêveng bibo, meşte kanalêko bîn eşkeno bêveng bibo. Ma do bêveng nêbê; ma do hemkarî û piştîdayîşê xo heme rojnameger û xebatkaranê çapemenîye reyde dewam bikerê.”
