Îstanbul – Edîtorê kurdkî yê Bîanetî, rojnameger Aren Yildirimî da zanayene ke îqtîdar nêwazeno şar averşîyayîşanê Tirkîya bizano û coka sansurî hem vera şarî hem vera medya xebitneno: “Êdî sansur bîyo tecrîdêko dîjîtal.”
Demêko derg o ke vera Çapemenîya Azade û çapemenîya rexnegire ya Tirkîya sansur û astengkerdişê zafî yenê kerdene. Goreyê raporê Komeleya Azadîya Îfadeyî (ÎFOD) êlule de tewr kêmî 1270 keyepel û hesabê X’î ameyî astengkerdene. Komeleya Rojnamegeran a Dîcle Firatî (DFG) zî da zanayene ke êlule de resayîşê 3 hezar û 491 tedeyîyanê dîjîtalan ame astengkerdene. Dezgehê çapemenî do 24ê teşrîna verêne de zaf bajaran de vera nê pratîkan bivejîyê meydanan.
Yildirimî vat ke îqtîdar 2016 ra nat sansurî sey tehdîdêk vera medyaya xoser, azad û alternatîfe xebitneno û wina dewam kerd: “Îqtîdar nêwazeno şar dizdî û bêhuqûqîyan ra agahdar bibo. Îqtîdar wazeno bi no rayîrê sansurî heqê agahîgirewtişî yê şarî sînordar bikero û Tirkîya û Rojhelatê Mîyanênî de raştîye şarî ra binimno. Coka rojnamegeran destbend kenê û keyepelanê dezgehanê xoseran asteng kenê.”
‘Ganî komel bi heme dînamîkanê xo vera nê sansurî vindero’
Yildirimî bale ante na raştîye ser o ke hesabê Ajansa Welat û Ajansa Mezopotamya demêko nêzdî de ameyî astengkerdene la no astengkerdiş medyaya alternatîfe ya muxalefetî de ca nêgirewt û vat: “Tedaya ke vera medyaya alternatîfe yena kerdene, vera medyaya kurdan zî yena kerdene. La gama ke teda vera medyaya kurdan bena tepşê înan bedilîyeno. Ganî na cîyayî bêra hewanayene ke rojnamegerî pîya vera tedayan vindê. Tena yewvengî eşkena vernîya tedayan bigîra.”
Yildirimî da zanayene ke hesabê X’î yê Bîanetî 30ê teşrîna verêne de ame astengkerdene û vat: “Heta nika qerarêko fermî nêameyo dayene. Ma nêzanenê ke hesabê ma seba çi û kamcîn tedeyî ameyo astengkerdene. X’î ma rê e-mail şawit û vat ke qeraro ke ameyo dayene, tatbîq nêkeno.”
