Amed de vizêr roşanê Newroze bi beşdarîya se hezaran ameye pîrozkerdene. Newroze de msajê xurtî ameyê dayene. La rojnameyê çapemenîya îqtîdarî ca nêda Newroze Û xebera Newroze sansur kerde.
Newroza Amedî 21ê Adare de Parka Newrozr de bi beşdarîya se hezaran bi sloganî “Raybero Azad Komelo Demokratîk” bi coşêko pîl ameye pîrozkerdene. Pîrozbayî de mesajê çareserîya demokratîk û waştişê azadîya fîzîkî ya Rayberê Şarê Kurdî Abdullah Ocalanî vejîyayê vernî. La rojnameyê hewiz û îqtîdarî qet ca nêda pîrozbayîya Newroza Amedî û xebera Newroze sansur kerde. Rojnameyan ra tena Sozcu û Karar ca da Newroze. La rastîya Newroze nîşan nêdaye.
Rojnameyê Hurrîyetî manşetê xo de ca da tehdîtanê Erdoan ke vera CHP’yî kerdê la qet ca nêda pîrozbayîya Newroza Amedî. Rojnameyê SABAHî zî rîpelê manşetî de ca da sebebê operasyonî yê vera Şaredarê Stenbolî Ekrem Îmamoglu û Newroza bi heybet a ke Amed de ameye pîrozkerdene, qet nêdî. Rojnameyê Sozcu zî manşetî de ca plananê qeyûm yê vera Şaredarîya Stenbolî û bi cumleyan ca da Newroze. Rojnameyê Sozcu reyna seba rêxistine çekûya ‘terorist’ şuxulnaye. Rojnameyê Cûmhûrîyetî zî manşetî de ca da Kongreya vera qeyûman ya CHP’yî û bale ant darbeya qeyûmî ya vera Şaredarîya Stenbolî. Cûmhûrîyetî qet ca nêda Newroze.
Rojnameyê Tirkîya, Yenî Şafak, Akşma, Mîllîyet, Akît û rojnameyê bînî zî ca nêda Newroze. Rojnameyê Karar ca da Newroza Amedî la bale ant nêwendişê mesajê Rayberê Şarê Kurdî Abdullah Ocalanî. Rojnameyê Karar seba girseyî vat ‘Xeylê welatî beşdarê Newroze bîyê.’
