Amed – Hemserekê MED-DERî Remzî Azîzoglu derheqê xebatanê komeleye yê serê ziwanî û statuya Kurdkî qisey kerd û vat: “Wexto ke gedeyî şinê wendegehanê dewlete ziwanê xo yê dayîke xo vîrîra kenê. Waştena ma awa ke ziwanê Kurdî bibo ziwano fermî, xebatê ma zî seba naye yo.”
Komeleya Cipersayîş û Ziwan û Kulturê Mezopotamyayî (MED-DER) Amed de 2017an ra heta ewro zaravaya Kurmancî û Kirmanckî yê Kurdkî perwerde dana û heta nika bi 10 hezaran kesî perwerde kerdê û bê mabên atolyeyanê ziwanî virazena.
Hemserekê MED-DERî Remzî Azîzoglu derheqê statuyê ziwanê Kurdkî û xebatê MED-DERî de qisey kerd.
Endî bi Kurdkî
Remzî Azîzoglu ard ziwan ke vakûrê Kurdîstanî de seba ke polîtîkayê dewlete yê asîmîlasyonî zaf ê, ziwanê Tirkî aver şîyo û wina qisey kerd: “Vakûrê Kurdîstanî de de dewlete dewî tal kerdî, seba gedeyanê 5 serreyan kreşî akerdî û gedeyî ziwanê xo ra durî vîstî. Asîmîlasyonêko zaf pîl mîyanê nê 20 serranê pêyênan de ame ramitene. Qiseykerdena ziwanê Kurdkî çi heyf ke zaf peyde şîye. Amancê ma oyo ke vakûrê Kurdîstanî de mîyanê gedeyan de qiseykerdena Kurdkî zêde bikime. Waştena ma aya ke şarê ma giranîya xo bido ziwanê xo ser, seba ke ziwanê ma nasnameya ma ya. Ma bi slogana ‘Êdî bi Kurdkî’ giranîya xo bidime ziwan û kulturê xo.”
‘Ma bi di zaravayanê Kurdkî perwerdeyêye danê’
Remzî Azîzoglu bale ante serê perwerdeya ziwanê Kurdkî û wina vat: “Perwerdeyê ma sey atolye dom kenê, serre de 4 beşî, nê her beşî 3ê aşmî domkenê. 2 zaravayanê Kurdkî; kurmancî û kirmanckî de perverde danê. Ma serede dest kenê ci heta asta mamostatîye perverdeye danê. Asta mamostatîye serrêk dom kena. Muracatê ma yê hamnanî qedînê, muracatê ma yê payîzî dest kenê ci. Atolyeyê ma hem ri bi ri yê hem zî onlîne yê. Ma muracatanê perverdeyan serê ripela xo ya medya dîjîtale de pare kenê. Wexto ke gedeyî şonê mekteban, ziwanê xo yê dayîke xo vîrîra kenê. Ma zî vazenîme ke vera na rewşa estîye ziwanê Kurdkî bibo wayîrê statuyêko resmî ke vîrîra nêşoro. Kar û xebatê ma zî naye ser ro yo. ”
