Îstanbul – Ewro serê sibayî rew polîsan ser eşt awanîya Halk TV’yî; kanalî rê qayûm ame tayînkerdene û weşanê kanalî ame vindarnayene. Parlamenter û Serekwekîlê Grûba Yenî Partî Alî Mahîr Başarirî dîyar kerd ke amancê nê operasyonî bêvengkerdiş o û vat: “Ma venga şarî danê ke wayîrê demokrasî û Halk TV’yî vejîyo.”
Bi qerarê tayînkerdişî bi seyan polîsî kewtî awanîya Halk TV’yî; polîsan demêk dekewtişê awanîye asteng kerd. Ablûkeyê polîsan dorûverê awanîya televîzyonî de dewam keno. Derheqê 18 kesan de qerarê destbendkerdişî ame dayene; Serekê Heyetê Weşanî yê Halk TV’yî Cafer Mahîroglu zî înan mîyan de yo. Înan ra 11 kesî ameyî destbendkerdene. Parlamenterî Yenî Partî şîyî Halk TV’yî û badê vejîyayîşê awanîye agahî dayî.
‘Halk TV’yî serrano seba şarî weşan keno’
Alî Mahîr Başarirî dîyar kerd ke operasyonê Halk TV’yî semedê xebatanê rojnamegerîye ame kerdene: “Halk TV’yî serran seba şarî weşan kerdêne. Ewro qayûm ame tayînkerdene. Ewro tena çend kanalî est ê ke weşanê muxalifî kenê; bi desan kanalê îqtîdarî est ê. Amancê nê operasyonî bêvengkerdiş o. Saete 5î de qayûm ame tayînkerdene. Ma venga şarî danê ke wayîrê demokrasî û Halk TV’yî vejîyo. No kanal ma hemine rê lazim o. Ma siba ra nat tîya yê û do tîya bê.”
‘Wazenê ke tu kes raştîye nêvajo’
Parlamenterê Yenî Partî yê Eskîşehîrî Utku Çakirozerî zî ard ziwan ke semedê cigêrayîşê raştîye no kanal ame sîyakerdene: “Ewro dewaya Îmamogluyî esta; no tesaduf nîyo. Wazenê ke tu kes raştîye nêvajo. Hema bahaneyî nêameyê îspatkerdene la qayûm yeno tayînkerdene. No kanal dizdîyê îqtîdarî eşkera kerdêne; coka no operasyon ame kerdene. Ewro zaf kanalî hetê îqtîdarî ra yenê kontrolkerdene; keyepel û hesabê rojnamegeran yenê qefilnayene. Ma sebebê naye zanenê.” Dorûverê awanîya kanalî de ablûkeyê polîsan dewam keno.
