Şêwirmendê Serekkomarî Mehmet Uçum derheqê prosesê Aştî û Komelê Demokratîkî û qanûnê çarçewa de dîyar kerd ke Rayberê Şarê Kurdî Abdullah Ocalan do Heyetê Cêrênî yê Bêçekkerdiş û Koordinasyonê Sîyasî de ca bigêro.
Şêwirmendê Serekkomar Recep Tayyîp Erdoganî Mehmet Uçum rojnamegeranê Federasyonê Çapemenîye yê Tirkîya reyde ame pêser. Mehmet Uçum kombîyayîş de derheqê prosesê Aştî û Komelê Demokratîk de rolê Rayberê Şarê Kurdî Abdullah Ocalanî û xeylê babetan de qisey kerd.
Ocalan do Heyetê Cêrênî de ca bigêro
Mehmet Uçumî ard ziwan ke Rayberê Şarê Kurdî Abdullah Ocalan do Heyetê Cêrênî yê Bêçekkerdiş û Koordinasyonê Sîyasî de ca bigêro û munaqeşeyanê derheqê banê ke Girawa Îmraliyî de ameyo viraştene ser o zî wina vat: “Ban sey yew uniteya girêdayeyê hepisxaneyî ameyo viraştene. Seba ke Abdullah Ocalan bieşko rolê xo yê prosesî hîna hewl bîyaro ca, no ban ame viraştene. Proseso ke Ocalanî reyde yeno rayraberdene dîyalogî ser o yo. Kamî ke rêxistine naye ro do ew betal bikero. Çira ke viraştişê banî îmtîyazêk nîyo, seba ke wezîfeyê xo hîna weş bîyaro ca hewcedarîyêke bîye.”
Raporê MGKyî do aşma teşrîna verêne ya zî teşrîna peyêne de bivejîyo
Mehmet Uçumî da zanayene ke raporê MGKyî ya aşma teşrîna verêne ya zî teşrîna Peyêne de do bivejîyo û wina vat: “Wina yeno pawene ke raporê MGKyî do bireso teşrîna verêne. Tesdîqkerdiş goreyê wareyî do bêro kerdene. Bêguman na babete de averşîyayîşî estê ke înan ser o erjnayîşî yenê kerdene. Destpêk de Heyeto Cêrên o ke binê banê koordînasyonê Cagirê Serekkomarî Cevdet Yilmazî de ameyo ronayene, do peynîya estbîyayîşê rêxistine tespît bikero û dima zî ke çek û muhîmatî ameyê teslîmkerdene yan nê, do bêro tespîtkerdene. Heyet do raporê hedrekero pêşkêşê MGKyî bikero û MGK zî do rapor bierjno û qerar bido. Dima ke qerar hetê Serekkomarî ra rojnameyo fermî de ameye îlankerdene, seba endamanê PKKyî prosesê muracatî yê 6 aşman do dest pêbikero.”
Rewşa girewteyanê sîyasî
Mehmet Uçum derheqê girewteyanê sîyasî û Selahattîn Demîrtaşî de zî dîyar kerd ke goreyê qanûnî seba girewteyê ke cezaya înan 5 serrî ya zî hîna kêmî ya înfaza înan 5 serrî, ê ke cezaya înan 15 serran ra zêdeyêr û muebed û muebeda girankerdîye ya zî înfaza înan 10 serrî bêro taloqkerdene. Eke mîyanê 5 yan zî 10 serran de ‘sucê terorî’ bikerê tehqîqat do dewam bikero. Seba ke Demîrtaş zî muracat bikero tu manî çin o. Muracat hetê mehkemeya eleqedare ra do bêro erjnayene. Qerarê na babete ser o do mehkemaya eleqedare bido.” Heto bîn ra Mehmet Uçumî pare kerd ke weçînayîşê Serekkomarîye do 16ê nîsana 2028î de bêrê kerdene û Serekkomar Erdogan do reya peyêne bibo namzed.
