Serekê Meclîsî Numan Kurtulmuşi derheqê qanûna çarçewa de îfade ke gerek ezberanê verênan ê ziwanê neyarî ra fek veradîyo û cayê ci de ziwanê aştî û way û birayîye bikewo pratîk.
Serekê Meclîsî Numan Kurtulmuşî tewrê programêkê Ajansê Anatolya (AA) bi û derheqê qanûnê çarçewa de qisey kerd. Numan Kurtulmuşî vat ke qanûn bi paştîdayîşêko gird ame qebulkerdene û vat ke no zî paştîdayîşê şarî yê seba prosesî dano mojnayene. Numan Kurtulmuşî da zanayene ke ganî Tirkîya cepheyê xo yê zereyî xurt bikera û vat: “Bi nê qanûnî do ber heta peynî abo. Na rayîr rayîrê way û birayî yo. Gerek êdî ziwanê hemver û neyarî ra zî fek veradîyo. Gerek bi ziwanê aştî û way û birayîye bêro qiseykerdiş. Gerek ezberanê verênan ra fek veradîyo û sîyasetê ezberî yê verênî qet tesîrê xo çin o.”
Dewamê qiseykerdişê xo de Numan Kurtulmuşî dîyar kerd ke qanûnê çarçewa qanûnê efûyî nîyo û nê çîyî vatî: “Do heyetan de yew bi yew dosyayan ser o qerarî bêrê dayene û caardişê ci zî do hetê heyetan ra bêro kerdene. O muhîm o yo ke êdî tu ciwanêko kurd do nêvajo, ‘Gerek ez şêra ko’ û gerek yewbîyayîş bêro ca. Do nê prosesî de provokasyonê Îsraîlî bibê. Ganî ma vera nê provokasyonan hîşyar bibê.”
