Serekê Odeyê Bazirganî û Pîşesazî yê Cizîrî Omer Farûk Yildirim û Serekê Borsayê Bazirganî yê Wanî Naîf Suer ke Amed de beşdarê beyanatê 53 sazîyanê bazirganî bîyî, wazenê ke gamanê bierzîyê û înan seba aştîyî hetkarîya pêvajo da.
Partîya Karkeranê Kurdistanî (PKK) 12ê Gulanî de beyanat da û qerarê xofesîhkerdişî îlan kerd. Dima beyanatê PKK’î, Kurdistan, Tirkîya û zaf welatanê dinyayî de qerarê PKK’î pozîtîf ameyî dîyayîş. Zaf kesayetî, sazî, partî û hereketî beyanatan danê û hetkarîya xo pêvajo nîşan danî. Amed de bi pêşengîya Odeyê Bazirganî û Pîşesazî yê Amedî bi beşdarîya 53 odeyanê bazirganî, pîşesazî û borsayanê bazirganî beyanat ame dayene û hetkarîya pêvajo ameyî kerdene. Beşdaranê beyanatî ra Serekê Odeyê Bazirganî û Pîşesazî yê Cizîrî Omer Faruk Yildirim û Serekê Borsayê Bazirganî yê Wanî Naîf Suer ke beşdarî beyanatî bîyî, ajansê ma rê (AW) qisey kerdî.
‘Hetanî nika gam biameynî eştiş’
Serekê Odeyê Bazirganî û Pîşesazî yê Cizîrî Omer Farûk Yildirim dîyar kerd ke ewro odeyanê bazirganî yê herême seba aştîyî veng da û wina qisey kerd: “Heta nika seba aştîyî erê nêbîyo, ganî gamanê bierzîyê. Aştîye seba ma zaf avzel û qiymetdar a. Dewlete seba aştîyî tay çikî waşt û PKK’î zî game eşt. Na rewşa baş wa xirab nêbo ser o ganî dewlete zî, PKKî zî game bierzo. PKK’î xo fesîh kerd, wa dewlete zî derheqê huqûq û haqanê merdiman de na babetan ser o game bierzo. Ma hêvîdar î ke qanûn de kurdî bêro naskerdiş. Ma hêvîdar î ke gamanê bierzîyê û çekî êdî nêkewê dewreyî. Ganî gamanê nika bierzîyê, çimkî wa pêvajo bi sabotajan re rî bi rî nêmano. Seba ke verî pêvajo ameyî xirab kerdene, ma nêwazî sey verên bibo. Ma wazenî bi aştîyêka bi rîmet pê bêro. Aştîye pê bêro, êdî merdimanê ma hewce nêbo ke şîrê sewbî welat û şaristanan de bixebitî.”
‘Ma hetanî peynî hetkarî danî pêvajoye’
Serekê Borsayê Bazirganî yê Wanî Naîf Suer zî destnîşan kerd ke seba temamîya Tirkîya pêvajo zaf avzel o û wina domna: “Welatê ma zaf zordarîye ant. Cuyê xo, nameyê aştîye çiqas weş o. Aştîye çikêkî zaf weş o. Ma hetanî peynî hetkarî danî pêvajo. Bawerîya ma est a ke pêvajo dewam bikero. Kesê ke neçarî ra dewanê xo veradayê est ê, ma hêvîdar î ke na aştî bandor bikera û her kes biagêra dewanê xo. Bila her kes hetê keyeyê xo de biciwo. Merdim gamê ver bi çimî wazeno bivîno. Bawerîya ma est a ke rojanê verî de ma çikanê weş bivînê. Pêvajoya şerî de welatê ma kewt mîyanê zaf krîz û kêmanîyan. Welatê ma tepa de mendo. Heta nika gamanê girdî nêameyo eştinî, labelê bawerîya merdiman pêvajo ra est a. Her kes wazeno mîyanê aştîye de bi kêfweşî biciwo. Demo ke şer est o, merdim feqîr beno. Tîya kesî xebate nêkerd. Ez bawer a ke bi aştîyî êdî rewşa aborî zî baş bena.”
