Wan – Qezaya Gurpinarî ya Wanî de bejrayîrê Wan–Colemêrgî ser o dêsêk ame viraştiş. No dês şîyayîş û ameyîşê dewijanê dewanê Nêrkox, Hîndîstan û Arixan rê beno asteng. Dewijan vera na rewşe reaksîyon mojna û vat: “Dêso ke dewlete verê camî de viraşto, sey yê Îsraîlî yo. Ma keyeyanê xo de sey hepsîyan ê.”
Rayîrê Wan û Colemêrgî ser o hetê qezaya Gurpinarî de dêsêk ame viraştiş û no dês şîyayîş û ameyîşê dewijan rê beno asteng. Bejrayîr mîyanê dewanê Nêrkox, Hîndîstan û Arixan ra vîyareno û dêso ke ey ser o yo, cuya dewijan ser o tesîrêko negatîf keno. Dewijê her hîrê dewan seba ke şêrê hetê bînê rayîrî hem kîlometreyan rayra şinê hem zî nêeşkenê heywananê xo berê hetê bînî.
Dewijê ke sebebê nê çîyî ra zehmetîyanê pîlan ancenê, dîyar kerd ke seba ke şêrê hetê bînê rayîrî, mecbur ê ke kîlometreyan rayra şêrê. Dewijî vanê ke seba vîyartişê heywanan neqebê binê erdî û rayîrê girêdayîşî yê emnîyetinî çin ê û înan mesulan ra çareserî waşte.
‘Dewlete ma kerdî di parçeyî’
Dewijê dewa Arixan Mustafa Tunçî dîyar kerd ke sebebê viraştişê dêsî ra dewe bîya di parçeyî; dewa înan bîya di letî, milê corêne û milê cêrêne. Mustafa Tunçî da zanayîş ke ê berdiş û ardişê pez û mangayan de zî zehmetî ancenê û vat: “Ma rewşa xo qeymeqam û Mudurîya Rayîranê Karayî rê vate la kesî goş nêda ma. Aşmêk verê cû tîya de qezayêka trafîkî bîye; yew pî merd, lajê ey zî bi giranî birîndar bî. Sewbîna traktorêk bêkontrol vejîya rayîr û di wendekarî merdî. Ca dûrî yo, heta ke ambulans yena, erêy manena. Nê pêro arşîwê dewlete de est ê. Ma parlamenteran, qeymeqamî û heme mesulan rê vanê la ma tu netîce nêgênê”
‘Wa mesulî bêrê cuya ma bivînê’
Mustafa Tunçî vera dêsê ke ame viraştiş nêrazîbîyayîşê xo mojna û vat: “Dêso ke dewlete verê camî de viraşto sey yê Îsraîlî yo û ma keyeyanê xo de sey hepsîyan ê. Seba ke dewe bîya di parçeyî, ma nêeşkenê şêrê hetê corî. Ma mecbur ê ke çadiran virazê û pezê xo tede verdê. Eke înan de tayê wijdan est o, wa bêrê bi çimanê xo cuya ma bivînê. Çarrayîr 10 kîlometreyî berz kerdo cor, ma mexdûr ê. Ma her roj nê rayîrî xebitnenê; seba ke ma şinê hetê çepî, ma trafîkî erzenê tehluke û coka ma rê ceza yena birnayîş. Ma wazenê ke dewlete problemê ma çareser bikero.”
‘Kes nêeşkeno şoro hetê bînî’
Dewijê dewe Qasim Tunçî zî dîyar kerd ke dêsî ra înan rê tu xêr çin o, ard ziwan ke dewlete dewe kerda di parçeyî û vat: “Dewe pêro heywanî vayîr kena la tu kes nêeşkeno şoro hetê bînî, çunke rayîr çin o. Welatîyî problemanê pîlan ancenê û no çî beno sebebê koçkerdişî. Seba ke ekonomî xirab bîya û qîymetê mazotî zêde bîyo, hîna kêmî kesî dewe de manenê. Ma wazenê ke dewlete ma rê ardim bikero. Wa nê kemerê ke mîyanê rayîrî de nayêro, bêrê wedarnayîş. Birarzayê mi 7 serrî verê cû qeza de seqet mend û nika rewşa ey baş nîya. Rayîrê dewe zî xirab ê, gedeyê ma mîyanê herre de şinê mekteb. Ma wazenê ke dewlete çareserîyêk bivîno.”
















