Hemsereoka Pêroyî ya DEM Partî Tulay Hatîmogullari dîyar kerd ke qanûnê çarçewa seba demokratîkbîyayîşî şino bingeyêko xurt awan bikero û wina vat: “Ganî nê qanûnî de ganî şert û mercê birêz Ocalanî bêrê caardene û bi hawayêko azad prosesê rayra bero. Ganî bieşko pêro beşanê komelî reyde pêvînayîşan bikero. Ganî sey mutabakato peyên qanûn vejîyo.”
Hemsereka Pêroyî ya DEM Partî Tulay Hatîmogollari meclîs de kombîyayîşê partîya xo de qisey kerd.
Tulay Hatîmogollari destpêkê qiseykerdişê xo de Partîya Newe ya Ozgur Ozelî pîroz kerd.
Tulay Hatîmogullari qiseykerdişê xo de bale ant qanûnê çarçewa ser o û wina vat: “2 serrî yo ke proses dewam keno. Nika zî behsê qanûnê çarçewa beno. Heyetê ma 20ê temmuze de birêz Ocalanî reyde pêvînayîş kerd. 21ê temmuze de birêz Numan Kurtulmuşî zîyaretê ma kerd û dîyar kerd ke verê ke meclîs bikewo tehtîl, qanûn do bêro meclîs. Ganî pêro partîyê sîyasî seba problemê seserrî çareser bibo berpirsîyarî bigerê. Birêz Ocalanî zî pêvînayîşê peyênî de muhîmîya bingeyê qanûnê çarçewa da zanayene û vano, ‘Ganî teng û bi munaqeşayanê rojaneyan nêro destgirewtiş û bibo destpêkê pelêka newa û derûdorêko newe.’ Sewbîna birêz Ocalanî pêro şaranê ma rê selamî erşawitê. Nêzdîbîyayîşê birêz Ocalanî seba çareserî zaf bi mana yo. Çareserî bi bingeyêko huqûqî têduştîye ser o mumkin o. Kurdî her tim ameyê înkarkerdiş la ewro kurdî û dostê înan seba awankerdişê aştîya komelkî têkoşîn kenê û muzakereyêko xurt rayra benê. Ganî agêrayîş bi hawayêko teng nêro destgirewtiş.”
‘Ganî sey mutabakato peyên qanûn vejîyo’
Tulay Hatîmogullari dîyar kerd ke ganî qanûnê çarçewa pêkerdişî ser o bêro caardiş û nê çîyî îfade kerdî: “Agêrayîş o yo ke ê ke sirgun de yê agêrê welat, ê ke zindan de yê do biresê keyeyanê xo, ê ke karî ra ameyî dûrvistiş do biresê karê xo. Ganî nê qanûnî de şert û mercê birêz Ocalanî bêrê caardene û bi hawayêko azad prosesî rayra bero. Gabî bieşko pêro beşanê komelî reyde pêvînayîş bikero. Ganî sey mutabakato peyên qanûn vejîyo. Heta îradeyê şaran nêro şinasnayene demokrasî awan nêbeno. Heta edalet seba pêro kesan seypê nêbo komar nêşina biba demokratîk. Qanûnê çarçewa nê çarçewa de eşkeno bibo bingeh û destpêkêko newe. Seba ayê zî ganî ma têkoşînê hemparî hîna xurt bikerê. Xelasîya pêro şaran û bawerîyanê ke ameyî înkarkerdiş zî tiya ra vîyarena.”
Problemê citkaran
Mabênê qiseykerdişê xo de Tulay Hatîmogullari bal ant problemanê citkaran ser o zî û nê çîyî îfade kerdî: “Citkarî nêeşkenê debara xo bikerê. Nêeşkenê heqê xo derbaz bikerê. Îqtîdar herinda ke çareserîye bîyaro ca, îhtalat keno. Îqtîdaro ke her tim behsê netewperestîye keno, Tirkîya hetê ramitişî de girêdayeyê teberî kerda. Na senî netewperestî ya? Karkerê mewsîmî her serre seba karî welatê xo ra yan hetê Behra Sîya şinê yan zî Behra Sipî. La rixmo nê zehmetîyan zî nêeşkenê debara xo bikerê. Polîtîkayê aborîye çareserîye nêanê. Seba ke citkarş na rewşe ra vejîyê ganî piştgîrîya berardiş bêra kerdiş, kooperatîfî bêrê awankerdiş, deynê citkaran bêrê pakkerdiş. Seba prosesê Aştî û Komelê Demokratîkî ke bi hawayêko serkewte encam bigêro na babete zî zaf muhîm a.”
Dawaya Gulîstan Doku
Tulay Hatîmogullarî dîyar kerd ke dewaya Gulîstan Doku de 6 serrî yo ke vernîya edaletî de dêsê ameyî viraştiş û wina dewam kerd: “Herinda ke edaletî bîyarê ca delîlî ameyî tarîkerdiş. Walîtîyê Dêrsimî Tuncay Sonel çîyêko normal nîyo. Pêro zî berhemê dewamê demê Suleyman Soylu yê. Ganî o dem ser o cigêrayîş bêro kerdiş. Gulîstan Doku, Rojîn Kabaîş û pêro cinîyê ke ameyî qetilkerdiş encamê zîhnîyetê camêrdan o. Heta qetilkerdişê cinîyan nêro roşnîkerdiş û edalet nêro ca ma do têkoşînê xo bidomnê.”
Qanûnê seba gedeyan
Tulay Hatîmogullarî derheqê qanûnê seba gedeyan ke meclîs de yeno munaqeşakerdiş zî nê çîyî vatî: “Herinda ke problemanê gedeyan çareser bikerê, înan ceza kenê. Suc ne şexsî nîyê komelkî yê. Gedeyî serê karî de cuya xo vîndî kenê. Feqîrîye reyde rî bi rî yê. Herinda ke nê probleman çareser bikerê û sebebanê suckerdişê gedeyan orte ra wedarnê, înan ceza kenê. Sey DEM Partî ma zî pêşnîyazêk meclîs rê kerd ke Wezaretê Gedeyan bêro awankerdiş û heqê gedeyan bêro pawitiş. Ma hêvî kenê ke o qanûnê gedeyan ke do bêro Komîsyonê Pêroyî bi nê hawayî derbaz nêbo û pêşnîyazê ma cayê xo bigêrê.”
Kongreya DEM Partî
Sewbîna Tulay Hatîmogullari bal ant kongreya partîya xo ser o û dîyar kerd ke amedakarîyê înan ê kongreyî dewam kenê û wina qedêna: “Seba kongre konferansê ma yê şaristanî qedîyayê û konferansê herêman dewam kenê. Ma do bi na xerîtaya xurtkerdişê têkoşînê hemparî yê demokratîkî şêrê kongre. Seba ke beşanê bînan reyde zî munaqeşayî bêrê kerdiş komxebatê ma zî dewam kenê. Seba kongre berpirsiyarî kewena serê milê ma pêrûnan. Ez her kesî rê serkewtiş wazena.”
