Welatîyê Wanî ke 4 rojî yo vernîya Şaredarîya Şaristanê Girdî ya Wanî nobete de yê, ard ziwan ke seba ke wayîrê îradeyê xo vejîyê tîya de yê û wina vat: “Wazenê dest bidê îradeyê ma ser o la îrade seba şaran û netewan rûmet o.”
Dimayê girewtişê cezaya hepisî yê Hemşaredarê Şaristanî Gird yê Wanî Abdullah Zeydanî vernîya Şaredarîya Wanî de nobeta pawitişê şaredarî roja 4. de dewam kena. Şarê Wanî 4 rojî yo şaredarî deqeyêk zî veng nêverdanê. Bi govende, slogan û deyîranê xo çalakîyanê xo domnenê û verba hewldayîşê qeyûmî xover danê.
‘Ma seba aştî amade yê’
Welatî Suleyman Dûrak dîyar kerd ke ê seba şeref û namûsê xo vernîya şaredarî de yê û vat: “Hewldayîşê qeyûmî seba ma heqeret o.” Suleyman Dûrak ard ziwan ke ê dewaya aştî, heq, hiqûq kenê û tena dewaya parçeyêk nêkenê, dewaya çar parçeyê Kurdîstanî kenê. Eke kesêk zî bimano ma na şaredarî nêdanê. Qeyûm xespkerdişê îradeyê şarî yo, ma ne nanê înan ser o yê ne zî awa înan ser o yê. Ma qeyûm û hêrişê Tişrînê ser o qebul nêkenê.”
‘Çira qeyûman tayîn kenê?’
Cevdet Tanriverdî zî verba tayînkerdişê hewldayîşê qeyûman reaksîyon nîşan da û dîyar kerd ke o seba îradeyê xo ameyê vernîya Şaredarîya Wanî. Cevdet Tanriverdî persê ‘Eke qeyûm tayîn kenê, çira weçînitişan kenê?’ rê wina cewab da: “Eke şima îradeyê şarê kurd qebul nêkenê, weçînitişan orte ra hewanê. AKP behsê aştî kena, eke wina bo çira qeyûman tayîn kenê? Ma netewêko mazlûm ê û ma destê birayîye dergê heme netewan kenê. Ma wazenê aştî bêra û êdî nê welatî de gonî nêrişa.”
‘Îrade seba netewan rûmet o’
Abdurrahman Bedîr zî bale ant nobeta vernîya şaredarîya ser o ke seba pawitişî ameya dest pêkerdene. Abdurrahman Bedîr ard ziwan ke îrade seba netewan rûmet o û wina dewam kerd: “Ziwanê ma, kulturê ma, heme çîyê ma qedexe yo. Ê se ra 50+1 bigîrê xo rewa vînenê la şarê kurd se ra 90 zî rayanê xo bido xo zî reyna hewl danê ke îradeyê şarê kurd xesp bikerê. Ma do heta peynî hetê hemşaredaranê xo bibê û wayîrê îradeyê xo vejîyê. Îradeyê ma rûmetê ma yo û şarê kurd zî wayîrê rûmet o. Ma do heta peynî tîya de bibê û ma do tu wext sereyê xo faşîzmî rê nêtewnê. Pî û bawkalanê ma sereyê xo nêtewnayo ma zî do tu wext sereyê xo faşîzm û dîktatorîyî rê nêtewnê.”
‘AKP wazeno kurdan bêrûmet biko’
Welatî Hesin Erkol jî dîyar kerd ke ê seba meaş, rant û qoltuxan tîya de nêyî û vat ke ê seba şerefê xo vernîya şaredarî de yê. Hesin Erkol a zanayene ke înan 31ê adare de îradeyê xo mojnayo û ard ziwan ke ganî ewro zî ê wayîrê îradeyê xo vejîyê. Hesan Erkol wina dewam kerd: “Îqtîdarê AKP’yî wazeno şarê kurd bêrûmet biko û ma sey kurdanê bi şeref tu wext naye qebul nêkenê. Kurdê ke xo roşenê nika quncikan de xo nimito û seba rant û menfeatanê xo şimşêrê xo tuj kenê. Ma senî tîya de govende gênê beno ke ê zî cayanê xo yê nimiteyan de govende gênê. Ez veng dana îqtîdarê AKP’yî, êdî bes o. Dişmenîya kurdan ra vek veradê.”
