Şarê Pirsûsî seba merdimanê xo yê ke Kobanê de yê û vera hêrişanê dewleta Tirke der ê, wina vat: “Kurdî tîya û ucayî sey yewbin ê. Gedeyê ma uca de yê, wa û birayê ma uca de yê. Ha hêrişê înan kenê ha ê ma. Ha ê ameyê qetilkerdene ha ma, tu ferq çin o.”
Hêrişê dewleta Tirke û SMO’yî yê verba Vakur û Rojhelatê Sûrîye dewam kenê. Kobanê zî a bajaran ra ya ke hemverê hêrişan de ya. No tehluke xo tewr Qezaya Rihayî Pirsûsî de dano hîskerdene. Her di qezayê ke bi sînoranê viraşteyan yewbînan ra aqitîyayê, merdimê yewbinî zaf ê. Şarê Pirsûsê ke merdimê înan binê hêriş û tehluke de yê, nobeta sînorê Kobanê û Pirsûsî de cayê xo girewto û ajansa MA’yî rê dîyar kerd ke hêrişêko yeno kerdene înan rê zî yeno kerdene.
‘Ha ê ameyê qetilkerdene ha ma’
Halîl Demîro ke tewrê nobedî bîyo dîyar kerd ke Kobanê û Pirsûs tarixî ra heta ewro yew ê. La bi awanbîyayîşê Tirkîya bi sînoranê viraşteyan yewbînan ra ameyê aqitîyayene.” Demîr hemverê hêrişan reaksîyon nîşan da wina vat: “Ez Pirsûs ra ya, la gedeyê yayka mi zî uca de ciwiyenê. Keyeyê ma ra zaf kesî dewê nêzdîyê sînorî de ciwîyenê. Kurdî tîya û ucayî yew ê. Ha yenê qetilkerdene ha ma, tu ferq çin o. Ganî tu kes nê hêrişan qebul nêkero.”
‘Heta hêrişî biqedîyê ma do sînorî ser o bê’
Kemal Barlîno ke merdimê ci Kobanê de ciwîyenê dîyar kerd ke keyeyê xo yê sînorê Kobanê ra vengê teqîyayîşî û guleyan eşnaweno û wina dewam kerd: “Mabênê ma û Kobanê de tena têl est o, tîya de rastî na ya. Ma merdimê yewbînan ê. Ma bi serran dayîş û girewtiş kerdo. Her ke vengê topan yeno ma, ma tersenê. Kes nêeşkeno ma yewbinî ra biaqitno. Dewlete se kena wa bikera la do tu çî nêbedilîyo.”
Barlîn dîyar kerd ke heta hêrişê merdimanê înan ser o dewam bikerê, ê do çalakîya nobetî de cayê xo bigêrê.
