Hemsereka Daîreyê Têkilîyanê Teberî yê Îdareyê Xoserî Îlham Ehmede îfade kerd ke derheqê serebûdan de ke Kobanê de û bi taybetî hepisxaneyî de qewimîyayî, tehqîqatî dest pêkerdo. Merasimê oxirkerdişê 9 tepişteyanê ke cuya xo ra bîyî, ewro yeno viraştene.
Badê tansîyonê rojanê peyênan ê Kobanê Îlham Ehmede, Hetkarê Walîyê Helebî Alî Henora û Mudirê Emnîyetê Kobanê Mecîd El Dîn El Şêx Merkezê Fermandarîya Asayîşê Zereyî de ameyî têhet. Kombîyayîşî de dosyayê asayîş û îdareyê bajarî ameyî munaqeşekerdene.
Ehmede badê kombîyayîşî eşkerayî daye û vat ke seba serebûdê Hepisxaneyê Kobanê û serebûdanê bînan ê peyênan komîsyonê tehqîqatî ameyo ronayene. Aye ard ziwan ke ganî tedbîrê munasibî bêrê girewtene ke serebûdê winasî reyna nêqewimîyê, keyeyanê şehîdan rê serweşî û birîndaran rê şîfa waşt û şarê Kobanê ra waşt ke bi berpirsîyarî tewrê merasimê oxirkerdişê şehîdan bibê.
Tansîyon senî berz bî?
Serebûdan 11ê êlule de bi protestoyêk dest pêkerd ke seba şermezarkerdişê şehîdkerdişê Sîpan Hiznî, şervanê Wezaretê Pawitişî yê Sûrîye, ame viraştene; badê protestoyî zaf ciwanî ameyî destbendkerdene. Wexto ke ame waştene ke tepişteyê Hepisxaneyê Kobanê bêrê şawitene hepisxaneyanê Helebî, hepisxane de tansîyon berz bî; serebûdan de 9 tepişteyî cuya xo ra bîyî û 17 tepişteyî birîndar bîyî.
Merasimê oxirkerdişî ewro Şehîdxaneyê Şehîd Dîcle yê Kobanê de yeno viraştene.
