DEM Partî serrgêra protestoyanê 6-8ê teşrîna verêne de eşkerayîyêka nuştekîye daye û qurbanîyê 6-8ê teşrîna verêne yad kerdî. Protestoyan vera hêrişanê çeteyanê DAÎŞî yê vera Kobanê bajaranê Vakurê Kurdîstanî de dest pêkerdbî.
DEM Partî serrgêra 12. ya protestoyanê 6-8ê teşrîna verêne yê seba Kobanê de hesabê xo yê Xî ser o eşkerayîyêka nuştekîye pare kerde. Eşkerayî de kesê ke protestoyan de seba piştîdayîşê Kobanê ganê xo vindî kerdbî, ameyî yadkerdene û wina ame vatene:
“Hema ke 12 serrî ser ra vîyartî zî, waştişê ma yê eşkerakerdişê heme hetanê hadîseyî hema nêameyo caardene. Eksê ney, seba heqîqetî tepiştişî bîyî; Hemserekê HDPyî Fîgen Yuksekdage û Selahattîn Demîrtaş zî mîyan de endamê MYKyî û sîyasetmedarî ameyî tepiştene û derheqê înan de Dewaya Kumpasî ya Kobanê ameye akerdene. Netîceya na dewa de derheqê hevalanê ma rê cezaya seyan serran ameye dayene. Nê Prosesê Aştîye û Komelê Demokratîkî de, seba haştîya komelkî ganî dadgehkerdişê bêhuqûqî vinderê, qerarê Dadgehê Heqanê Merdiman ê Ewropa bêrê caardene û hevalê ma bêrê verdayene. Seba ke heqîqet vejîyo meydan, ma do têkoşînê edalet û azadîye dewam bikerê.”
