KCDK-E û TJK-E ard ziwan ke tansîyono ke Rojavayî de badê qetlkerdişê Sîpan Hiznî dest pêkerd, resayo merheleyêka “zaf” talûkeyine û vengdayîşê pawitişê yewîya şaran kerd.
Kongreya Komelanê Demokratîkan a Kurdîstanijanê Ewropa (KCDK-E) û Têgêrayîşê Cinîyan ê Kurdanê Ewropa (TJK-E) eşkerayîya xo ya hempare de vat ke averşîyayîşê ke hîs û hesasîyetanê şaranê kurd û ereban kenê hedef û eşkenê şaran vera yewbînan tahrîk bikerê, ganî qet sey tesadufî nêrê dîyene: “Serebûdanê ke bi Şehîd Sîpan Hiznî dest pêkerd, zemînêko talûkeyin pêt kenê ke hedefê ci ardişê kurd û ereban hemverê yewbînan û girdkerdişê kîn û nefretê mabênê şaran o. Resayîşê tansîyonî yê heta hepisxaneyê Kobanê û cuya xo ra bîyayîşê 9 welatîyanê ma yê adirê ke hepisxaneyê tepişteyan ra vejîya ke hêrişanê nijadperestan ê hukmatê Şamî protesto kerdêne, reyna giranîya rewşe mojna.”
Dezgehan verê heme keyeyanê welatîyanê ke cuya xo ra bîyî, şarê Kobanê û Rojavayî rê serweşî û birîndaran rê şîfa waşt: “Vera nê provokasyonanê talûkeyinan pawitişê cuya hempare, wayûbirayî û yewîya şaranê ma ewro her wextî ra zêdeyêr berpirsîyarîyêk o. Ganî ma vera her cehdî ke wazeno şaranê kurd û ereban bîyaro hemverê yewbînan biaqil hereket bikerê, destûr nêdê provokasyonan û îradeyê pîyaciwîyayîşê şaran pêt bikerê.”
