Têgêrayîşê Cinîyan ê Kurdan ê Ewropa (TJK-E) serrgêra çarine ya qetlkerdişê Jîna Emînî de venga piştîdayîşêko pêtêr vera îdam, tedaya sîyasî û her tewr hêrişê vera îradeyê cinîyan da.
TJK-E bi munasebetê serrgêra çarine ya qetlkerdişê cinîya ciwane ya kurde Jîna Emînî ke Tehran de badê destbendkerdişê polîsanê exlaqî ameybî qetlkerdene, eşkerayîyêka nuştekî daye. Eşkerayîye de ame vatene ke têkoşînê azadîya cinîyan ke Îran û Rojhelat de berz bî û bi vateyanê “Jin, Jiyan, Azadî” dinya ra vila bî, ewro hema zî ganî yo; cinî û şarî vera teda, înkar û zorî îradeyê xo yê azadî, seypêyî, demokrasî û wayîrêvatebîyayîşê ser o ameyoxê xo pawenê.
TJK-E bale ante polîtîkayanê rejîmê Îranî yê tepiştişê muxalefetî ser o û vat: “Cinîyê Rojhelat û Îranî bi şertanê tedaya girane reyde zî rêxistinbîyayîşê xo pêt kenê û waranê têkoşînê xo hîra kenê. Kampanyayê vera îdamî sînoranê Îranî vîyarnenê û benê babeta piştîdayîşê mîyanneteweyî.” Eşkerayîye de ame dîyarkerdene ke “Jin, Jiyan, Azadî” bi Şorişê Rojawanî resa girseyanê hîrayan û bi xoverdayîşê cinîyanê Rojhelatî hîna unîversal bî; hereketê cinîyan ê her çar hetanê dinya yê vera qetlanê cinîyan qewet û îlhamê xo fikrê azadîye yê nê sloganî ra gênê. Waştişê cinîyan ê wayîrêvatebîyayîşê cuye, beden û ameyoxê xo ser o nêyeno taloqkerdene û nêbeno babeta bazarî: “Komelo ke azadîya cinîyan tede çin a, behsê demokrasî, seypêyî û azadîya rastikêne nêbeno.”
Eşkerayîye bi nê vateyan qedîyaye: “Ewro çîyo ke hewce yo bêvengî nîya, piştîdayîşêko pêtêr o. Berzkerdişê vengî vera polîtîkayanê îdamî, tedaya sîyasî û her tewr tatbîqatê ke îradeyê cinîyan kenê hedef; asayekerdişê têkoşînê cinîyanê Îran û Rojhelatî û têhetardişê nê têkoşînî bi têkoşînê hempar ê azadîye yê cinîyanê dinya, ewro her wextî ra zêdeyêr muhîm o.”
