Qetlkerdişê Jîna Emînî ya ke Îran de bîye sembolê serewedartişê “Jin, Jiyan, Azadî”, yê Tehranî ra çar serrî vîyartî. Pîyê aye Emced Emînîyî vat: “Kênayêka ma est bîye û înan a ma ra girewte. La heskeridşê merdiman bi hezaran gedeyê bînî ardî beşdarê keyeyê ma kerdî.”
Emced Emînîyî bi munasebetê serrgêra mergê kênaya xo hesabê xo yê medyaya sosyale ra mesajêk weşana û vat ke çar serrî vîyartî zî dejê înan sivik nêbîyo; Jîna seba înan hema zî kênaya înan a ke şayî dana cuya înan. Ey ard ziwan ke badê mergê kênaya ey nameyê aye sînoranê keyeyê înan vîyarnayo û piştîdayîş û heskerdişê komelî bi hezaran gedeyê bînî ardî keyeyê înan.
Emînîyî vat ke seba may û pîyêkê ke kênaya xo vindî kerda, manaya wextî cîya ya û fotograf, vîrameyîş û heta eşnawitişê nameyê Jîna zî serebûdî reyna anê vîrî; ey pawitişê xo yo eşkerakerdişê heqîqetî ard ziwan û vat: “Name û vîrê Jîna heta kilmê ma yê peyênî ma reyde ciwîyenê. Singê nê erdan de zaf ganî est ê; kes heme nê sirran nêzano.”
Jîna Emînî 16ê êlule 2022î de Tehran de hetê “polîsê exlaqî” ra ameybî destbendkerdene û qetlkerdene; naye rasterast peyê xo de heme Îran de serewedartişêko bêhempa bi sloganê “Jin, Jiyan, Azadî” vet meydan.
