Koordînasyonê Kongra Starî eşkerayîya xo ya serrgêra pancine ya şorişê “Jin, Jiyan, Azadî” de ard ziwan ke têkoşînê azadîya cinîyan bi polîtîkayanê îdamî reyde zî dewam keno: “Ma do îradeyê rêxistinbîyaye yê cinîyan pawitişî dewam bikerê.”
Kongra Starî eşkerayîya xo ya nuştekî de bi şexsê Jîna Emînî û Şîler Resulî cinîyê ke têkoşînê azadîye de cuya xo ra bîyî, ardî vîrî û vat ke “Jin, Jiyan, Azadî” tena sloganêk nîyo, felsefeyêka cuy a ke azadîya cinîyan bingeyê azadîya komelî de nana ro û Rojhelatê Kurdîstan û Îranî ra heme dinya ra vila bîya.
Eşkerayîye de ame dîyarkerdene ke rejîmê Îranî polîtîkayanê xo yê teda, tepiştiş û îdamî yê vera cinîyan zêde kerdî û bale ameye antene têkoşînê cinîyanê ke hepisxaneyanê Ewîn û Qerçakî de xover danê, ser o; mesajê piştîdayîşî Paxşane Azîzî, Werîşe Moradî, Bîta Hemmatî, Arghavane Fallahî û cinîyanê binan ê tehdîdê îdamî rê ame dayene. Kongra Starî ard ziwan ke qetlê cinîyan û tehakumê vera bedenê cinîyan netîceyê sîstemê pederşahî yê; bi şexsê Nîlûfere Mecawir cinîyê ke ameyî qetlkerdene ardî vîrî û vat ke piştişo mecbûrî, sûckerdişê rêxistinbîyayîş û azadîya îfadeyê cinîyan, tepiştişê sîyasî û îdamî parçeyê eynî polîtîkaya teda yê; zêdebîyayîşê teda qewetê rejîmî ney, tersê ci yê îradeyê azadîye yê cinî û komelî mojneno.
Eşkerayîye wina qedîyaye: “Serra pancine ya Jin, Jiyan, Azadî de êdî zaf eşkerayêr aseno ke tu sîstemo teokratîk nêeşkeno îradeyê azadîye yê cinîyan heta ebedî bitepişo. Ma do kişta xoverdayîşê cinîyan de bimanê ke Rojawan ra heta Rojhelatî, Rojhelatê Mîyanênî ra heta her çar hetanê dinya vila bîyo; ma do cuya azade, komelê demokratîkî û îradeyê rêxistinbîyaye yê cinîyan pawitişî dewam bikerê.”
