Rayberê Şubeyê SES’î yê Wanî Umît Çapayî dîyar kerd ke sîstemê weşîye Wan de binkewto û vat: “Çinbîyayîşê xizmetê bi ziwanê dayîke, astengîyêka pîl a ke nêweşî nêeşkenê xo baş îfade bikerê. Demo doktor û nêweşî yewbînan ra fehm nêkerê, xizmet zî nêreseno cayê xo.”
Cuya merdimî de weşîye, tena çinbîyayîşê nêweşî nê, bingeyê estbîyayîşî û rewşa başbîyayîşê fîzîkî, psîkolojî û komelkî yo. Labelê ewro herême de no heqo bingeyîn binê dorpêçê polîtîkayanê aborî û tedayanê sîyasî de yo. Nêweşê Vakurê Kurdîstanî girewtişê xizmetanê weşîye de hem feqîrî hem zî astengîya ziwanê dayîke reyde rî bi rî manenê. Na çarçewa de Sendîkaya Kedkaranê Weşîye û Xizmetanê Komelkî (SES) vera sîstemê ke weşîye sey “malê bazirganîye” û “meta” vîneno, ey reyde têkoşînê xizmetêkê bêpere, têduşt û bi ziwanê dayîke dano. Rayberê Şubeyê SES’î yê Wanî Umît Çapayî zî bale ant krîzê herême ser o û dîyar kerd ke ê sey sendîka tena heqanê kedkaran nê, pawitişê heqanê şarî yê heyatî kenê.
‘Wan de kapasîte binkeweno’
Umît Çapayî dîyar kerd ke nêweşxaneyê Wanî êdî cewabê lazimtîyan nêdanê û vat: “Nêweşxanaeyî kapasîteya xo ra vêşêr xebitîyenê. Nêweşxaneyê unîversîte seba 400 cile ameyo amadekerdene la nika sey 600 cile xebitîyeno. Krîz tewr zaf xo giranîya nêweşan, kêmbîyayîşê hûmara xebatkaran û binkewtişê sîstemê randevuyî de xo mojneno. Serra peyêne de nêzdîyê 300 cipersayîşî ameyê kerdene û mîyanê nînan de se ra 90 cezayê înan ameyê qebulkerdene. No zî mojneno ke prosesê dsîplînî bîyo hacetêkê teda û binvistişî.”
‘Binkewtişê sîstemê randevuyî şarî mexdur keno’ 0
Umît Çapayî seba binkewtişê sîstemê randevuyî zî wina vat: “Wan de xoresnayîşê xizmetê weşîye yê şarî ameyo sînordarkerdene. Sîstemê randevuyî yo binkewte û demêko derg pawitiş şarî mexdur keno. Sewbîna Wan de kêmbîyayîşê hûmara doktoranê piişspor problemo tewr serek yo. Beşanê sey norolojîya gedeyan, kardiyolojî û gastroenterolojî de kemaneyê pîlî est ê.”
Xizmetê bi ziwanê dayîke
Umît Çapayî bale ant bêparmendişê welatîyan ê xizmetê bi ziwanê dayîke ser o û vat: “Çinbîyayîşê xizmetê bi ziwanê dayîke, astengîyêka pîl a ke nêweşî nêeşkenê xo baş îfade bikerê. Demo ke doktor û nêweşî yewbînan ra fehm nêkerê, xizmet zî nêreseno cayê xo.”
‘Weşîye heq o, nêyeno rotiş’
Umît Çapayî peynîya qiseykerdişê xo de vengdayîşê bedilnayîşê polîtîkayanê nikayînan kerd û waştişê xo îfade kerdê: “Waştişê ma zelal o, ma vanê ke weşîye heq o, nêyeno rotiş. Sîstemêkê weşîya merdimîne bi polîtîkayanê hîra, têduşt û demokratîk eşkeno bêro awankerdene. Ganî her kes bieşko bi ziwanê xo yê dayîke xizmetanê weşîye ra îstîfade bikero.”
