Hunermend Ulaş Kelaşîn ke tewrê Festîvala Kultur û Xoza ya Kanîreşî bi, diyar kerd ke ganî hunermend û roşnvîrî prosesê Aştî û Komelê Demokratîkî de rolê xo yê pêşengîye bîyarê ca û waşt ke na festîvale biba wesîleyê aştî û azadîye.
Qezaya Kanîreşî de ke tewr peyên tebaxa 2014î de Festîvala Kultur û Hunerî ya Karacehenemî ameyî kerdiş, dimayê 12 serran 23 û 24ê temmuze de Festîvala Kultur û Xoza ya Kanîreşî ameye kerdiş. Festîvale de musabeqaya vazdayîşê estoran ra bigîre heta paneê derheqê ekolojî de, goşdarîkerdişê dengbêjan ra bigîre heta qîseykerdiş û konseran programê cîyayî ameyî kerdiş. Hunermend Ulaş Kelaşîn ke hunermendan ra yew bi ke tewrê festîvale bi, derheqê festîvale û prosesê ewroyî de ajansê ma rê qîsey kerd.
‘Festîvale hêvî û coşî dana komelî’
Ulaş Kelaşînî dîyar kerd ke organîzekerdişê festîvale ê dimayê 12 serran zaf erjîyaye yo, bale ant eleqeyê zêde yê şarî ser o û wina vat: “Ewro ma bi heyecan ê û coşêko pîl mîyanê şarî de vînenê. No çî mojneno ke komelê ma çend wayîrê kultur û hunerê xo vejîyeno. Ez hêvîdar a ke na festîvale serranê ameyoxan de zî dewam bikera ke şarê ma wayîrê kultur û hunerê xo bivejîyo.”
‘Rolê hunermend û roşnvîran seba aştî muhîm o’
Ulaş Kelaşîn dewamê qîseykerdişê xo de bale ant prosesê Aştî û Komelê Demokratîkî ser o û rolê hunermendan ê nê prosesî ser o û nê çîyî îfade kerdî: “Kurdîstan û Tirkîya de prosesêko aştî est o. Bêguman no proses tesîrêko baş komelî ser o keno. Nê prosesî de rolê hunermend, roşnvîr, nuştox û roşnvîran zaf muhîm o. Ganî hunermendî pêşengîya nê prosesî bikerê ke aştîyêka domdare û komelêko azad awan bibo. Hêvî û waştişê ma no yo ke na festîvale biba wesîleyê aştî, wayûbirayî û azadîye.”
Ulaş Kelaşîn peynîya qiseykerdişê xo de waşt ke proses bieso amancê xo û na festîvale seba komelêko azad û demokratîk pêşengîye bikera.
