Vateyê nefretî û vengdayîşê nêheqîyêk vera komelanê elewî û durzîyan ê Sûrîye de nê demanê peyênan de zêde bîyê. Bi kampanyayanê ke warê platformanê medyayê dîjîtalî de ameyê destpêkerdene, amanc o yo ke her di komelan warê ekonomî û komelî de yewbînan ra biaqitnê.
Bi kampanyayêka newe ya hashtagî ya ke 31ê gulane de ameye destpêkerdene, waştişê birnayîşê giredîyayîşê tîcaretî û komelî yê bi welatijanê elewî û durzî ame kerdene. Kesê ke mîyanê kampanya de ca gênê, sûrîyeyîjê ke zere û teberê welatî de ciwîyenê înan ra waşt ke karsazê ekonomî yê elewî û durzîyan boykot bikerê.
Parekerdişan de eşkerayîyê cîyakar ê sey vernîgirewtişê domanan yê hevaltîya bi domananê elewî û durzîyan, dûrkewtişê silamkerdayîşê merdimanê nê komelan, dûrkewtişê karsazîyê înan, kîrakerdiş yan zî rotişê banan înan rê û nêdayîşê karî înan rê mîyanê xo de hewînenê.
Kampanya hetê derûdorê nêzdîyê HTŞ’yî ra paştî girewt
Her çend kampanya hetê derûdorê nêzdîyê HTŞ’yî ra paştî bigîra zî, ê yê ke seba cuya pîya ya bawerî û nasnameyanê cîyayan Sûrîye de pawitoxî kenê, vera nê vengdayîşan tesîrêko negatîf mojna. Bi eşkerayîyanê ke medyaya dîjîtale ser o ameyî dayîş, ame dîyarkerdiş ke kampanyayê bi nê tewirî, teşwiqê cîyayîyê mezhebî kenê, aştîya komelî xeripnenê, welat hîna zaf erzenê mîyanê kaosî û problemanê mezhebî gir kenê.
