Çimdarîya Heqanê Merdiman a Sûrîye da zanayîş ke destpêkê teşrîna peyêne ya emserî ra nat mintiqayanê cîya-cîyayan ê Sûrîye de sebebê teqayîşê mayînan û mendeyanê şerî ra 49 kesî merdî yan birîndar bîyî; zafê înan domanî yê.
Mayînî, cebilxaneyê ke nêteqayê û mendeyê şerî hema zî zaf mintiqayanê Sûrîye de cuya sîvîlan erzenê tehluke. Nê tehlukeyî erdanê ramitişî, dewan, keyeyan û mekteban de vila bîyê û cuya şarê uca erzenê tehluke.
Mendeyê şerî her roj cuya sîvîlan erzenê tehluke
Rixmê vindertişê operasyonanê eskerîyan zî, mendeyê şerî her roj cuya sîvîlan tehdîd kenê. Çimdarîya Heqanê Merdiman a Sûrîye destpêkê teşrîna peyêne ya emserî ra nat merdişê 10 sîvîlan ke 8 domanî û 2 camêrdî înan mîyan de bîyî û birîndarbîyayîşê 39 kesan ke 23 domanî, 2 cinî û 14 camêrdî înan mîyan de bîyî, belge kerd. Ame dîyarkerdiş ke nê kesî sebebê teqayîşê mayînanê erdî, cebilxane, top û bombeyanê ke şerê verênî ra mendê, merdê yan birîndar bîyê.
31 înan ra domanî bîyî
Bi na hûmare, hûmara kesanê merdeyan û birîndaran resaya 49 kesan û 31 înan ra domanî yê. Na hûmare pîlîya tehlukeya mendeyanê şerî ya seba domanan mojnena; taybetî nê cebilxaneyî mîyanê cayanê ke şar tede ciwîyeno, erdanê ramitişî û cayanê ke şar cuya rojane de xebitneno de vila bîyê.
Wilayetanê cîya-cîyayan de teqayîşê mayînan û mendeyanê şerî
Goreyê Çimdarîye, hadiseyê teqayîşî wilayetanê Dêrazor, Îdlib, Hema, Humus, Hesekê û Dera de qewimîyayê. Tayê nê hadiseyan wexto ke pes çerênayêne û erdanê ramitişî de xebitîyêne, qewimîyayê; tayê zî sebebê teqayîşê cebilxane û bombeyan ê zerreyê keyeyan û mekteban ra. Sewbîna tayê kesan sebebê xebitnayîşê darûberanê ke zerreyê înan de cebilxaneyê şerî bîyî, seba germbîyayîşî cuya xo vîndî kerda.
Mîyanê hadiseyanê tewr muhîman de, rojawanê Palmîra de, dewanê Humusî de, hîrê domanan wexto ke pes çerênayêne, sebebê teqayîşê mayînêkê erdî ra cuya xo vîndî kerde.
Sewbîna mintiqaya Meîzîle ya dewanê Ebû Kemalî de, rojhelatê Dêrazorî de, di domanê yew keyeyî merdî û di domanê bînî zî birîndar bîyî. Dewa Kifir Secne ya dewanê başûrê Îdlibî de zî sebebê teqayîşê bombeyêka misketî ya mendeyanê şerî ra zerreyê keyeyêk de kênekêka qijkeke merde û pîrika aye birîndar bîye.
Tehlukeya mendeyanê şerî agêrayîşê sîvîlan asteng kena
Nê hadiseyî mojnenê ke tehlukeya mayînan û cebilxaneyanê ke nêteqayê êdî tena cayanê şerê verênî ra sînordar nîya; resaya keye, mekteb, erd û cayanê çerayîşê pesî zî. No çî cuya sîvîlan her tim erzeno tehluke û agêrayîşê înan ê ver bi cuyêka emîne asteng keno.
Çimdarîya Heqanê Merdiman a Sûrîye Neteweyanê Yewbîyayeyan û rêxistinanê pisporan ê pakkerdişê mayînan û mendeyanê şerî rê veng da ke xebatanê cigêrayîş û pakkerdişê cayanê ke bi mayînan û cebilxaneyanê nêteqayeyan qilêrin bîyê, zêde bikerê.
Sewbîna dîyar kerd ke ganî cayanê ke şar tede ciwîyeno, mekteban, erdanê ramitişî û cayanê çerayîşê pesî ra mendeyê şerî bêrê pakkerdiş, programê hişyarkerdişê şarî yê derheqê tehlukeyanê mayînan û mendeyanê şerî de bêrê xurtkerdiş û pawitişê sîvîlan bêro garantîkerdiş.
Mayînî agêrayîşê koçberanê Serêkanî asteng kenê û cuya domanan erzenê tehluke
Tehlukeya mayînan û mendeyanê şerî tena bi kiştiş û birîndarbîyayîşê sîvîlan sînordar nêmanena; eynî wext de bena astengêko sereke yê verê agêrayîşê koçberanê Serêkanî. Mayînî erdanê ramitişî, keyeyan, mekteban û cayanê ciwîyayîşî de vila bîyê û cuya sîvîlan, taybetî zî ya domanan, erzenê tehluke. Nê mayînî bîyê sebebê zaf teqayîşan û netîceyê ci de zaf sîvîlan cuya xo vîndî kerda yan birîndar bîyê. Rixmê dewamkerdişê xebatanê cigêrayîş û wedaritişê mayînan ê dewanê Serêkanî zî, hema zî zaf cayî hewcedarê pakkerdişî yê û no çî agêrayîşê koçberan asteng keno.
12ê teşrîna peyêne ya na aşme de, domano 12 serre Zahid Mehmûd Mensûr ke koçberanê Serêkanî ra yo û dewa El-Êgîbeşî ya dewanê rojawanê Til Temirî de ciwîyeno, sebebê teqayîşê mayînêkê erdî ra birîndar bî. Sewbîna estbîyayîşê mayînan û xirabeyîyan dorûverê Mektebê Şehîd Ehmed El-Wecirî yê dewanê vakurê Til Temirî de cuya zafêrî 200 wendekaran erzeno tehluke. No zî bîyo sebeb ke tayê keyeyî domananê xo nêşawê mekteb.











