Hunermend Beser Şahîn bal ant muhîmîya ziwan û kulturî ser o û vat ke ganî şar wayîrê ziwanê xo bivejîyo. Beser Şahîn derheqê prosesê nikayên de zî wina vat: “Ha masa de ha zî muanqeşayan de temsîlkarê kurdan Serek o. Ez bawer kena serek ser keweno.”
Hunermend Beser Şahîn derheqê ziwan, kultur û prosesî de ajansê ma rê qisey kerd. Beser Şahîn bal ant muhîmîya ziwan û kulturî ser û vat ke ganî şar wayîrê ziwanê xo bivejîyo. Beser Şahîn derheqê prosesê Aştî û Komelê Demokratîkî de zî wina vat: “Ha masa de ha zî munaqeşayan de temsîlkarê kurdan Serek o. Ez bawer kena serek ser keweno. Serek masa de hem xo hem zî şarê xo paweno. Ma çiqas karê xo bikerê, hende paştî danê serekê xo.”
‘Komel bi ziwanê xo, kulturê xo û nasnameyê xo est o û yeno şinasnayene’
Beser Şahîn îfade kerd ke komel bi ziwanê xo yeno şinasnayene û wina dewam kerd: “Komel bi ziwanê xo, kulturê xo û nasnameyê xo est o û yeno şinasnayene. Eke ziwan çin bo komel çin o, roj çino, erd çin o, koyî çin ê. Kultur estbîyayîşê komelî yo, kultur nasnameyê komelî yo. No het ra merdimî çiqas bi ziwanê xo qîsey bikerê, hende rind o. Komelê ma zaf dej dî, bedêlê giranî dayî, surgun bi, şehîdî dayê, ameyî kiştene. Na herre de ti destê xo danî kamcîn ca, to reyde qisey keno. Domanê ma anê ziwan.”
‘Serekê ma ewro cayêko teng de girewte yo, reyna zî seba ma têkoşîn keno’
Beser Şahîn bal ant Prosesê Aştî û Komelê Demokratîkî ser o û vat: “Kurdan rojê zaf giranî dîyî, la ewro kurdan xo resnayo yew merhale ke dewlete reyde roniştî. Tîya ra pey barê komelî muhîm o. Nê prosesî de baro giran reyna zî milanê şarî ser o yo. Heme şarê kurdî ganî barê xo bizano. Kam çi keweno milê ey, ganî bîyaro ca. Ez ewro hunermend a, çi keweno milê mi, ganî ez bîyara ca. Dayîkan ra heta cinîyan, domanan û camêrdan, ganî herkes barê xo bizano. Ma serekê xo ra bawer kenê. No şaar ewro çi girewto destê xo, çi qezenç kerdo, saya bedêlanê giranan û şehîdan o. Serekê ma ewro cayêko teng de girewte yo, reyna zî seba ma têkoşîn keno. Ez serekê xo ra bawer kena, ez girêdayeyê serekê xo ya.”
‘Ha masa de ha munaqeşayan de temsîlkarê kurdan Serek o’
Beser Şahîn veng da komelî û vat: “Ha masa de ha zî muanqeşayan de temsîlkarê kurdan Serek o. Ez bawer kena ke Serek ser keweno. Serek azadîya xo ra ver azadîya komelê xo wazeno û vano, ‘Mesele tena azadîya mi nîya, çîyo ke ez wazena azadîya nê şarî ya. Komelê mi hetê ziwan û kulturê xo ra bêro şinasnayene, bibo wayîrê statu. Tirk û kurdî wa bibê seypê.’ Serek masa de hem xo hem zî şarê xo paweno. Ma çiqas karê xo bikerê, hende paştî danê serekê xo. Serekê ma xora çi karê ey est o ano ca. Serek ma paweno. Serek reyna mîyanê tenganîye de ma paweno.”
Beser Şahîn peynîya qîseykerdişê xo de bal ant ziwanê kirmanckî (zazakî) ser o û seba wayîrvejîyayîşê ziwanî veng da şarî.
