Ciwananê Wanî dîyar kerd ke ê rîyê polîtîkayanê aborî û bêkarîye ra, verê xo danê metropolan û karanê bitehluke de xebitîyenê.
Goreyê daneyanê Sazgeha Îstatîstîkî ya Tirkîya (TÛÎK); şaristananê sey Wan, Mûş, Bedlîs û Colemêrgî de nisbetê bêkarîye se ra 17,2 ya. No nisbet mojneno ke herêma ke Wan zî tede ya, mîyanê Tirkîya de bêkarîye asta tewr berze de ya. Na rewşe bena sebeb ke ciwanî verê xo bidê metropolan û binê şert û mercanê bitehluke de bixebitîyê.
‘Bêkarîye tesîrêko pîl cuya rojane ser o kena’
Wan de ciwananê ke mîkrofonê ajansê ma rê qisey kerd, dîyar kerd ke bêkarîye her ke şona zêde bena û vat ke bêkarîye şert û mercanê cuye giranêr kena. Ciwanan vat ke tewrê wendiş û cehdanê înan zî, ê nêşênê karêko domdar bivînê. Ciwanan îfade kerd ke rîyê şertanê aborî, zaf kesî bêçare manenê ke welatê xo ra şêrê yan zî karanê giran û bitehluke de bixebitîyê.
Tewrê tehlîkeyan zî verê xo danê metropolan
Ciwanan vat ke ê nêwazenê emrê xo yê 21-22 serrî de cuya xo ra bibê û vat: “Heqdestê înşaetan weş o, labelê tehlukeyê ci zaf ê. Ma wazenê cuyêka hîna weş biciwîyê. Metropolan de zaf qezayê karî qewimîyenê û rîyê çinbîyayîşê îmkanan ra, ma bêçare manenê ke nê karanê bitehlukeyan bikerê.”
