Anqara – Verfeka DEM Partî Ayşegul Dogan îfade kerd ke Rayberê Şarê Kurdî Abdullah Ocalan muzakerekerdoxê sereke yê prosesî yo û vat: “Birêz Ocalan aktoro sereke yê nê prosesî yo. Ganî birêz Abdullah Ocalan bieşko koordînasyonî de ca bigêro, şert û mercê ey zî goreyê ney bêrê rastkerdene.”
Verfeka DEM Partî Ayşegul Dogan, merkezê pêroyî yê partî de derheqê qanûnê çarçewa de eşkerayî daye. Ayşegul Dogan vat qanûnê çarçewa destpêkeko muhîm o û wina dewam kerd: “No qanûn seba 86 mîlyonan zaf muhîm bi. Ê îmzayî seba ameyoxê ma manadar bî. Ma zî vanê seba kesanê ke seba cuyêka hempar têkoşîn kenê, bi xêr bo. Ma heme kesanê ke bedêlê giranî dayê bi rêzdarî vîr anê. Ma dest bi dewrêko newe kenê. Seserra 2. ê komare de, ma prosesêko ke pîya awankerdişî de yê. Ganî ma têkoşîno hempar girdêr bikerê. Bi nê qanûnî berê aştî, demokrasî û awankerdişî ame akerdene. Elbet kêmanîyê ey estê, la seba firsendanê pozîtîf destpêke ke yo. No qanûn elbet problemê kurdî çareser nêkeno, no girêdayeyê têkoşînî ma yo, berêk akeno.“
Ayşegul Dogan dîyar kerd ke ganî têkoşîn seba aştî û demokrasî bêro girdkerdene û vat: “No qanûn bi netîceyanê muzakere û pêvînayîşanê demdergî virazîya. Ma heme kesê ke piştîdayîşê nê qanûnî kerdê, înan rê spas kenê. No qanûn seba agêrayîşê welatî zî berêk akeno. Raya ewilina ke problem bi qanûnan yeno çaresekerdene. Ma zî pêşnîyaz kerd bi ke seba teqîbkerdişî heyet bêro awankerdene. Pênîyazê heyetan, qanûnî de muhîm ê. Meclîsî de zî awankerdişê heyetêk zaf muhîm o. No berpirsîyarîyê heme partîyanê sîyasîyan o. Peynîardişê dewrê çekan, demokratîkbîyayîş lazim o. No firsend seba heqê ziwanê dayîke û heqê îfadeyê xo zemînêko demokratîk akeno.”
‘Ganî birêz Abdullah Ocalan bieşko koordînasyonî de ca bigîro’
Dewamê qiseykerdişê xo de Ayşegul Dogan vatişê Rayberê Şarê Kurdî Abdullah Ocalanî yo “Eşkeno bibo kilîtêk” ard vîr û vat: “Birêz Ocalan aktoro sereke ê nê prosesî yo. Ganî birêz Abdullah Ocalan bieşko koordînasyonî de ca bigêro, şert û mercê ey zî goreyê nê bêrê rastkerdene. No seba averşîyayîşê prosesî û vernîgirewtişê xeteyan zaf muhîm o. Ganî ma şert û mercanê aştîye pîya awan bikerê. Ma qalê ameyoxêko hempar kenê. Ganî ma nê firsendî baş bixebitni. Ma bi nê cidîyetî nêzdî benê û ganî heme kesî zî bi eynî cidîyetî nêzdî bibê. Berêko newe abeno. Ganî ma pîya nê berê ra derbas bibê. Ganî ma fek ziwanê cîyakîtîye û dişmenîye ra verdadê û bi ziwanêko aştîyane bixebitnê. Sere de îqtîdar û heme partîyê sîyasî ganî ziwanêko aştîyane bixebitnê.”
Ayşegul Dogan persanê rojnamegeran ra zî îfade kerd ke nedîyar o ke do endamê rêxistine bi vengdayîşê Rayberê Şarê Kurdî agêrê yan nê. Sewbîna Ayşegul Dogan persê ser o îfade kerd ke rolê Herêmê Federe ya Başurê Kurdîstanî heta nika zaf muhîm bîyo û pozîtîf nêzdî bîyî. Ayşegul Dogan vat ke goreyê qanûnê çarçewaye, ganî girewteyê sîyasî bêrê veredayene û vat ke xora verê nê qanûnî zî girewteyê sîyasî ê ke derheqê înan de qerarê Mehmekeya Heqanê Merdiman ê Ewropa (DMME) esto, bêrê veredayene.
