Abdullah Ocalan: Amancê mi caardişê haştî û sîyasîbîyayîşî yo. Hemverê haştîye çekanronayîş, hemverê sîyasîbîyayîşî sîyasetê demokratîk û komelo demokratîk o.
Heyetê Îmralîyî yê DEM Partî derheqê têhetameyîşê xo yê Rayberê Şarê Kurdî Abdullah Ocalanî de na eşkerayî daye:
“Ma sey Heyetê Îmralîyî yê DEM Partî 13ê êlule 2026î de Girawa Îmralîyî de birêz Abdullah Ocalanî reyde ameyî têhet. Têhetameyîşî de proseso ke Tirkîya tede ya, averberdişê çareserîya demokratîke û haştîya menda, gamê şênberî ke seba averşîyayîşê prosesî ganî bêrê eştene û averşîyayîşê herêmkî ameyî qiseykerdene.
Nirxnayîşê birêz Abdullah Ocalanî yê ke seba raya pêroyî kerdî, bi kilmkî wina yê:
‘Prosesê Haştî û Komelo Demokratîk merheleyêk de yo ke caardişê berpirsîyarîyanê tarîxîyan bê taloqkerdiş wazeno. Demê badê vejîyayîşê qanûnî de eştişê gamanê pratîkan ê muşterekan û destpêkerdişê xebata çalake ya konseyan çarçewaya na berpirsîyarîye de zaf muhîm o.
Amancê mi caardişê haştî û sîyasîbîyayîşî yo. Hemverê haştîye çekanronayîş, hemverê sîyasîbîyayîşî sîyasetê demokratîk û komelo demokratîk o.
Vernîya Tirkîya de firsendêko tarîxî est o. Seba ke no bireso haştîyêka menda û çareserîya demokratîke, ez pawena ke herkes û her beş bi na hişmendî hereket bikero û ez bawer kena ke do bikero. Bêvengîye de nêmendişê îradeyê haştîye û girewtişê ci yê binê garantîya rêzkerdişanê şênberan ê huqûqî û sîyasîyan, wezîfeyêko nêtaloqbîyaye yo.
Prosesê Haştî û Komelo Demokratîk eynî wext de pîyaciwîyayîşê heme şar û bawerîyanê Rojhelatê Mîyanênî yê bi haştî, azad û seypê keno hedef. Averşîyayîşê herême bi eşkerayî mojnenê ke proses hemsengîyanê hesasan ser o şuxulîyeno û nê rasterast prosesî ser o tesîr kenê. Coka seba betalkerdişê provokasyonanê muhtemelan ganî girewtişê meseleyanê herême yê bingeyê dîyalog û muzakere esas bibo. Serebûdê Rojawanî zî ganî na çarçewa de bêrê nirxnayene.’
Ma sey Heyetê Îmralîyî yê DEM Partî wazenê reyna bale biancê ser o ke nêzdîbîyayîşo bingeyin ê birêz Ocalanî mendekerdişê haştîye, pêtkerdişê sîyasetê demokratîkî û demokratîkbîyayîşê Tirkîya yo.
Rayîrê haştîye akerde yo. Nika wextê mojnayîşê îrade û pratîkê sîyasî yo ke nê rayîrî aver bero.
Bi hurmet.
Heyetê Îmralîyî yê DEM Partî
14ê êlule 2026″
