Serokê DTSOyê Mehmet Kaya di civîna bi rojnamegeran re diyar kir ku ew dixwazin pêvajo bi erênî pêş bikeve ku bandorê li ser aboriya Kurdistan û Tirkiyeyê bike û xwest ku şerê li Sûriyeyê bisekine û aramî û aştî serwer bibe.
Odeya Bazirganî û Pîşesaziyê ya Amedê (DTSO) û pêkhateyên xwe bi minasebeta 10ê Çile Roja Rojnamegerên Dixebitin li Navenda Gastronomî ya DTSOyê bi rojnamegeran re civîna taştê li dar xist. Piştî ezimandina taştê ya rojnmegeran, daxuyanî hate dayîn.
Pêşî endamê Desteya Şêwrê ya Bilind a DTSOyê Burç Baysal daxuyanî xwend û bal kişand ser 10ê Çile Roja Rojnamegerên Dixebitin û got ku bi wesîleya rojê kêfxweş in ku li gel rojnamegeran civiyan e û vê rojê li kedkarên çapemeniyê pîroz dikin. Burç Baysal anî ziman ku rojnamegerî tenê ne pîşeyek e di heman demê de berpirsiyariyek civakî ye, fedakariyê dixwaze û rojnamegerî peywîrek feydeya ji bo raya giştî ye.
‘Pêvajo dê bandorê li ser aboriya Tirkiyeyê bike’
Piştre Serokê DTSOyê Mehmet Kaya axivî û di destpêka axaftina xwe de 10ê Çile li rojnamegeran pîroz kir û got çapemenî di her warî de bi rolek girîng radibe. Kaya bal kişand ser xebat û karên ku odeya wan di salekê de kiriye û amarên xebata di bin banê odeya wan de hatine kirin parve kir. Kaya her wiha got ku odeya wan dixwaze aboriya Amedê bi pêş ve bibe û di her warî de ji karsaz û esnafên Amedê re bibe alîkar. Kaya bal kişand ser çareserkirina pirsgirêka Kurd û got ku heke pêvajo bi awayekî erênî û serkeftî pêk were dê aboriya Amedê, aboriya welat jî baş bibe û dê pêvajoya Aştî û Civaka Demokratîk bandorek erênî li her qadên jiyanê bike.
‘Divê li Sûriyê aramî pêk were’
Kaya bal kişand ser şerê li Helebê diqewime û got ku ew li Sûriyeyê şer naxwazin dixwazin aramî, aştî û pêkhate hemû di nav hev de bijîn û li şûna şer aştî were bicihkirin. Kaya destnîşan kir ku ew dixwazin deriyên sînorî yên li ser binxetê û serxetê ango di navbera Bakur û Rojava de jî bên vekirin û danûstandina aborî û civakî li pêş bikeve. Mehmet Kaya diyar kir ku bi taybetî ew dixwazin deriyê sînor ê di navbera Qamişlo û Nisêbinê de bê vekirin.
‘Em dixwazin deriyek din jî were vekirin’
Mehmet Kaya anî ziman ku pêwendî û danûstandinên wan ên bi Herêma Kurdistanê re hene û dixwazin ev danûstandinên aboriyê baştir bibin. Mehmet Kaya bi bîr xist ku Deriyê Sînor ê Xabûrê têrê nake û xwest ku deriyek din jî were vekirin ku çûnehat gelek hêsan bibe.
Mehmet Kaya herî dawî destnîşan kir ku rêxistinê xwe fesix kiriye û divê hikûmet jî li gorî vê hesasiyetê tevbigere û pêvajo ji bo feydeya gel bi pêş ve biçe.
