Platforma Jinan a Dîcle Amed û Tora Li Dijî Tundiyê ya Amedê têkildarî tundiya li ser jinan meşiyan û diyar kirin ku ji ber derketina ji Peyama Stenbolê, pêkneanîna qanûna 6284an jin bêdeng dimirin.
Li Tirkiye û Kurdistanê di meha gulanê de 21 jin hatin kuştin. Di meha hezîranê de jî bi dehan jin ji aliyê xizmên xwe û mêran hatin kuştin. Li Amedê bi pêşengiya Platforma Jinan a Dîcle Amed (DAKAP) û Tora Li Dijî Tundiyê ya Amedê, di nava wan de Hevşaredara Bajarê Mezin a Amedê Serra Bucak, endam û rêveberên DEM Partî, DBPê, saziyên jinan hebûn gelek jin li pêşiya avahiya Şaredariya Bajarê Mezin a Amedê kom bûn û heta Qada Şêx Seîd meşiyan.
Jinan pankarta “Em dijî kuştina jinan di nava serhildanê de ne” vekirin. Di meşê de jinan dirûşmeyên “Jin Jiyan Azadî”, “Bijî berxwedana jinan” berz kirin. Piştî jin gihîştin Qada Şêx Seîd daxuyanî dan. Sekretera Egîtîm Senê ya Hejmara 1ê ya Amedê Arzu Koç daxuyaniyê xwend.
‘Ji di bin navê zayenda civakî de tên kuştin’
Arzu Koç diyar kir ku polîtîkayên bêcezakirinê cesaretê dide kujeran û wiha axivî: “Desthilatdar qirîna jinan paşguh dike. Jin di bin navê ‘zayenda civakî’ de tên kuştin. Em bêdeng dimirin. Ev bêdengî ji ber derketina ji Peyama Stenbolê, pêkneanîna qanûna 6284an diqewime. Bi hinceta “Rewşa baş” cezayên kujeran tên daxistin.”
‘Felsefeya me Jin Jiyan Azadî ye’
Arzu Koç destnîşan kir ku armanca wan ne tenê cezakirina kujeran e û wiha domand: “Armanca me jiyana hevpar, guherandina sîstema perwerdehiyê ye. Lê divê pêşî dev ji gotinên dijmanatiye were berdan. Em ê ji bo jiyanek azad, birûmet her dem têkoşîna xwe berdewam bikin. Felsefeya me Jin Jiyan Azadî ye.”
Piştî daxuyaniyê jinan dest bi çalakiya rûniştinê kirin.
