TJAyê derbarê bûyerên li Kobanê de ku 9 kesan jiyana xwe ji dest dan û 17 kes birîndar bûn, daxwaza lêpirsînek serbixwe û şefaf a li ser bûyeran kir û bang kir ku pêşî li dijberiya gelên Kurd û Ereb were girtin.
Tevgera Jinên Azad (TJA) têkildarî bûyerên Kobanê daxuyaniyeke nivîskî weşand.
Daxuyaniya TJAyê bi vî rengî ye:
“Geşedanên ku bi şehadeta Sîpan Hiznî li Rojava dest pê kirin û bi jiyana 9 welatiyên me li Kobanê girantir bûn, ji bo gelên me xetereyek cidî nîşan didin. Berî her tiştî, em sersaxiyê ji malbatên welatiyên xwe yên ku jiyana xwe ji dest dane û ji hemû gelê me re dixwazin û ji birîndaran re şîfayê dixwazin; em ji gelê Kobanê re jî sersaxiyê dixwazin. Divê destûr neyê dayîn ku ev pêşketinên ku hesasiyetên civakî yên gelên Kurd û Ereb hedef digirin, bibin pevçûnek ku gelan li dijî hev rake.
Divê bûyer bi tevahî werin lêkolînkirin
Tiştên qewimîne nikarin ji pêvajoya entegrasyonê ya li Sûriyeyê pêk tê, serbixwe werin nirxandin. Nêzîkatiyên li hember mafên ziman û nasnameyê yên gelê Kurd, bertekên civakî û bûyerên provokatîf ên piştre, hebûna hêzên ku dixwazin bi karanîna hesasiyetên gel pêvajoyê sabote bikin, nîşan didin. Divê qetilkirina Şehîd Sîpan Hiznî û bûyerên li Kobanê di vê çarçoveyê de werin lêkolînkirin û hemû berpirsiyar derkevin holê. Divê hikûmeta Şamê û hêzên girêdayî wê polîtîkayên xwe yên zext û tundûtûjiyê yên li dijî gel bi dawî bikin; divê bûyer bi awayekî serbixwe û zelal werin lêkolînkirin. Tepeserkirina pirsgirêkan bi rêbazên ewlehiyê tenê dê rageşiyê kûrtir bike.
Jiyana hevpar hedef tê girtin
Wekî TJAyê, em bang li eşîrên Ereb, rêberên raya giştî û hemû hêzên civakî yên li herêmê dikin: Divê li dijî provokasyonan tevgerên berpirsiyar werin kirin û rê li ber afirandina dijminatiyê ya di navbera gelan de neyê vekirin. Nakokiyeke Kurd-Ereb ne di berjewendiya tu gelî de ye. Her hewldanek ji bo hedefgirtina îradeya jiyana bi hev re ya gelan di heman demê de pêşeroja demokratîk a Sûriyeyê jî hedef digire. Girîng e ku civaka navneteweyî, hêzên demokratîk, avahiyên siyasî û civakî yên li Sûriyeyê û hemû aktorên ku pêşketinên li herêmê dişopînin li hember tiştên ku diqewimin bêdeng nemînin. Pêşeroja Rojava û Sûriyeyê ne li ser nakokiya di navbera gelan de, lê li ser wekhevî, edalet, demokrasî û jiyana hevbeş dê were avakirin.”
