Di 96emîn salvegera Komkujiya Geliyê Zîlanê de, li navçeya Erdîşê daxuyaniyek hat dayîn. Di daxuyaniyê de bang li dewletê hat kirin ku arşîvên xwe veke û hat gotin ku heta dewlet bi Kurdan re rûbûrû nebe nikere aştiyê ava bike.
Bi munasebeta 96emîn salvegera Komkujiya Geliyê Zîlanê, Tevgera Jinen Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Parti) yên Erdîşê ya Wanê, li gundê Ada Xêybê daxuyaniyeke çapemeniyê li dar xistin. Di daxuyaniya ku pankarta ‘Komkojiya Geliyê Zîlan ji bîr nekin da ku nebe dîsan’ hat vekirin de, metna daxuyaniyê ji hêla Hevseroka DEM Partiyê ya Erdîşê Yasemîn Agaoglu ve hat xandin. Parlamenterê Wanê Mahmut Dîndar, nûnerên saziyên sivîl û gelek welatî beşdarî daxuyaniyê bûn.
Yasemîn Agaoglu di daxuyaniyê de bal kişand ser dîrok û birîna kûr a komkujiyê û diyar kir ku Komkujiya Zîlan ne tenê rûpeleke raboriyê ye, parçeyekî hafizeya hevpar e. Yasemîn Agaogluyê destnîşan kir ku rûbûrûbûna bi êşên rabirdûyê re, lêkolînkirina azad a bûyerên dîrokî û parastina hafizeya civakî berpirsyariya herî bingehîn a civakeke demokratîk e.
Yasemîn Agaoglu her wiha da zanîn ku ji bo nehiştina êşên bi vî rengî, divê gavanên qanûnî yên ji bo ‘Pêvajoya Aştî û Civaka Demokratîk’ ku ji hêla Rêberê Gelê Kurd Abdullah Ocalan ve hatiye destpêkirin, demildest werin avêtin.
‘Dewlet bila arşîvên xwe veke’
Piştre Parlamenterê DEM Partiyê yê Wanê Mahmut Dîndar axivî û diyar kir ku dema îro li van çiyayan dinêrin, komkujiya 96 sal berê tînin bîra xwe û dilerizin.
Dîndar destnîşan kir ku dewletê bêyî ku bibêje zarok, jin an pîr, pêncî hezar Kurd di komkujiyê re derbas kirine û mixabin îro jî heman hişmendî berdewam dike.
Mahmut Dîndar destnişan kir ku Kurd qet vê qirkirinê ji bîr nakin û diyar kir ku divê dewlet demildest bi Kurdan re rûbûrû bibe û wiha got: “Dewlet divê bi Kurdan û birêz Ocalan re rûbûnrû bibe û ev kesên ku komkujî kirine werin darizandin. Van çiyayan têra xwe komkujî dîtin. Hûn heta bi van komkujiyan re rûbirû nebin nikarin aştiyê ava bikin. Em li pişt pêvajoya ku birêz Ocalan daye destpêkirin in û divê dewlet li gorî vê yekê gavan biavêje.”
Piştî daxuyaniyê girseyê derbasî cihê ku komkujî lê qewimiye, bû û gulên sor danîn ser axê û paşê ji bo temaşekirina sînevîzyonê derbasî avahiya DEM Partiyê ya Erdîşê bû.
