Komeleya Mafê Mirovan li Cizîrê dest bi Nobeta Aştiya Civakî û Xwişk-Biratiyê kir. Di nobetê bang li dewletê hat kirin ku qanûna çarçoveyî derxîne û gavan bavêje.
Şaxa Komeleya Mafên Mirovan (ÎHD) a Şirnexê li ber Birca Belek a navçeya Cizîrê dest bi Nobeta Aştiya Civakî û Xwişk-Biratiyê kir. Parlementerên DEM Partiyê yên Şirnex Newroz Ûysal Aslan û Mehmet Zekî Îrmez, endam û rêveberên partiyên siyasî û saziyên civakî gelek kes tev li nobetê bûn.
Hevserokê Şaxa ÎHDê ya Şirnexê Şivan Sakman di nobetê de axivî û got: “Vaye ji salekî pêtir pêvajoyek ya aştiya hatiye destpêkirin. Di vê salê de ji aliyê PKKê ve gelek gav hatin avêtin û êdî divê dewlet li gor pêvajoyê qanûnan derxîne û ev qanûn bikevin makezagonê.”
Parlementer Mehmet Zekî Îrmez diyar kir ku divê li her derê gel û sazî ji bo aştiyê tevbigerin û wiha got: “Divê ne tenê li Cizîrê li her derê gelê me û saziyên me derkevin qadan û aştiya birûmet bixwazin. Tevgera gelê Kurd ji bo aştiyê gelek tişt kirin û ji bo aştiyê gelek berdêl dan. Ji îro û pê ve jî tişta bikeve ser milê me em ê bikin. Ji bilî gavên hatine avêtin êdî perpirsyarî dikeve ser milê dewletê. Gelê me aştiyek birûmet dixwaze û divê gotina gel esas were girtin. Helbet Pêvajoya Aştî û Civaka Demokratîk Rêberê Gelê Kurd Abdullah Ocalan bi rê ve dibe û ev gel jî piştgiriyê dide vê yekê. Divê dewlet nêrînên Birêz Ocalan esas bigire û gavên pêvajoyê pêşve bibe biavêje. Daxwaza gelê me ev yek e. Di rojên dawî de derbarê qanûna çarçoveyê de gelek tişt tên gotin û ev gotin fikarekî di hişê me de çêdike. Divê qanûna çarçoveyê derkeve û ji bo çareseriyê bibe bersiv.”
‘Em ji bo pêşeroja xwe li vir in’
Serokê Odeya Sanayî û Bazirganiyê ya Cizîrê Omer Farûk Yildirim jî da zanîn ku divê di aştiyê de tu kes winda neke û wiha axivî: “Îro li vir tenê ne nobetek tê girtin, îro em ji bo pêşeroja xwe li vir in. Erdnîgariya me gelek êş kişandin. Êdî divê li ser erdnîgariya me çîroka aştî û wekheviyê were nivîsandin. Di aştiyê de divê tu kes winda neke û divê ev pêvajo neyê dirêjkirin.”
‘Em dev ji têkoşîna edaletê û aştiyê bernadin’
Serokê Şaxa Egîtîm Senê yê Şirnexê Adnan Şenbayram ê ku beriya niha bi 3 hevalên xwe re ji peywirê hatibû dûrxistin da zanîn ku heya aştî bê vî welatî ew ê tekoşîna xwe berdewam bikin û wiha axivî: “Kesên ku zarokên xwe spartine vê axê û kesên ku 50 sal in berdêl didin aştiyê dizanin. Dibe îro em ji peywirê hatibin dûrxistin lê li hember berdêlên hatine dayîn ev ne tiştek e. Encam çi bibe bila bibe em dev ji tekoşîna xwe ya edaletê û aştiyê bernadin.”
Nobeta Aştiya Civakî û Xwişk-Biratiyê piştî axaftinên beşdaran bi dawî bû.
