Şaxa ÎHDê ya Îzmirê, bi boneya balê bikişîne ser rewşa girtiyên nexweş, çalakiya xwe ya rûniştinê ya ku ji du hefteyan carekê li dar dixe, vê hefteyê jî domand. Di çalakiyê de bal kişandin ser rewşa girtiyê 68 salî Mecît Baştaş ku li Girtîgeha Tîpa L a Panosê tê ragirtin.
Şaxa ÎHDê ya Îzmirê, bi boneya balê bikişîne ser rewşa girtiyên nexweş, çalakiya xwe ya rûniştinê ya ku ji du hefteyan carekê li dar dixe, li ber Sumerbanka Kevn a Konakê domand. Di çalakiyê de pankarta “Girtiyên nexweş dimirin, bêdeng nemîne nebe şirîkê vî sûcî” hat hilgirtin û dirûşma “Ji girtiyên nexweş re azadî” hat berzkirin. ÎHDê di çalakiya vê hefteyê de bal kişand ser rewşa girtiyê 68 salî Mecît Baştaş ku li Girtîgeha Tîpa L a Panosê tê ragirtin.
Daxuyanî ji aliyê Rêvebera Şaxa ÎHDê ya Îzmîrê Vetha Aydin ve hat xwendin.
‘Piştî emeliyatê derman û kontrolên wî nayên kirin’
Vetha Aydin diyar kir ku Mecît Baştaş bi nexweşiyên giran û kronîk re rû bi rû ye, pençeşêr e û heta niha du caran emeliyat bûye. Cara dawî di 2yê Sibata 2026an de hatiye emeliyatkirin û got: “Her çend divê sê mehan carekê kontrolên wî bên kirin jî, ji ber ku sewqên nexweşxaneyên herêmê 7 û 12 mehan dikişînin, kontrolên wî nayên kirin. Tetkîkên piştî emeliyatê nehatine temamkirin û pergala dermanan a ji bo pençeşêrê hîna nehatiye avakirin.”
Vetha Aydin her wiha destnîşan kir ku nexweşiyên Mecît Baştaş ne tenê pençeşêr e; ew di heman demê de li ber nexweşiyên wekî prostat, kîstên gurçikan, nexweşiya pişikê, hîpertansiyon jî têdikoşe, lewma divê Mecît Baştaş ji bo tedawiyê were berdan an jî sewqî nexweşxaneyeke tamteşekkûl were kirin û wiha got: “Lazim e Mecît Baştaş sewqî nexweşxaneyên Wanê bibe ku li wir pispor û derfetên teknîkî hene. Em bang li saziyên peywendîdar dikin ku rê li ber tedawiya wî vekin û gavên hiqûqî biavêjin. Her roja ku derbas dibe, metirsiya li ser jiyana wî zêdetir dibe. Berpirsiyarên her encameke neyînî, ew kes in ku li hemberî vê îhmalkariyê çavên xwe digirin.”
‘Bila Mecît Baştaş were berdan’
Vetha Aydin bi van gotinan dawî li daxuyaniyê anî: “Heta ku mafê jiyanê û tedawiyê yê girtiyên nexweş bê mîsoger kirin, em ê daxwazên xwe bînin ziman. Divê girtiyê nexweş Mecît Baştaş demildest were berdan.”
