HSDê ragihand ku hikûmeta Şamê agirbestê binpê dike û êrişên xwe li ser Kobanê didomîne. HSDê bang li garantorên agirbestê kir ku berpirsyariyên xwe bi cih bîne.
Navenda Ragihandinê ya Hêzên Suriya Demokratîk (HSD) li ser binpêkirina agirbestê ya ji aliyê komên hikûmeta demkî ya Şamê ve pêk tên, daxuyaniyek da.
Daxuyanî bi vî rengî ye:
“Ji saet 02.00an ve komên girêdayê Şamê bi dijwarî êrişan dibin ser eniyên bajarokê Xerab Îşkê û Çelebiyê yên başûrê rojhilatê bajarê Kobanê. Di heman demê de taxên niştecihan û derdora her du bajaran bi obîsan bi dijwarî topbaran dikin.
Ji ber van êrişan şerekî giran di navbera hêzên me û komên êrişkar de derket. Hêzên me heya vê kêliyê bersiva êrişan didin û bi taybetî li bajarokê Çelebiyê pevçûn dewam dikin. Di heman demê de komên êrişkar teqwiyeyeke leşkerî ku ji tank û panzêran pêk tê, anîne. Li gel wê jî balafirên bêmirov ên dewleta Tirk li ser herêmê digerin.
Ev êriş binpêkirineke eşkere ya agirbestê ku ev 2 roj e hatiye ragihandin. Ev yek dide diyarkirin ku Şamê sozên xwe bi cih nayne û di siyaseta rageşiya leşkerî û têkbirina ewlehiya herêmê de dewam e.
Hêzên me li hember êrişan mafê parastina rewa bi kar tîne. Şam berpirsa van binpêkirinên û bandorên wê yên mirovî û ewlehiyê ye. Li ser vê yekê em bang li aliyê garantorên peymana agirbestê dikin ku berpirsyariyên xwe bi cih bînin, tavilê bikevin nava tevgerê van êrişên Şamê rawestînin û sînorekê ji rageşiya domdar re deynin.”
