Heyva Sor a Kurd ji bo rawestandina êrişên li ser sivîlên li Helebê û vekirina korîdora mirovî ya bi ewle bang kir û ji bo veguhestina birîndaran konvoyeke tenduristiyê ya ji 15 wesayitan pêk tê şand herêmê.
Di êriş û komkujiyên çeteyên hikumeta demkî ya Şamê li taxên Şêxmeqsûd, Eşrefiyê û Benî Zêd ên Helebê gelek kes jiyana xwe ji dest dan û hejmarek mezin jî birîndar bûn. Heyva Sor a Kurd têkildarî mijarê daxuyanî da.
Daxuyanî li ber avahiya Heyva Sor a Kurd a li bajarê Hesekê hat lidarxistin. Hevserokên Heyva Sor a Kurd a Herêma Bakur û Rojhilatê Sûriyeyê Hediye Abullah û Dilgeş Îsa daxuyanî xwendin.
‘Alîkariya mirovî tê astengkirin’
Di daxuyaniyê de hate gotin, ji ber hedefkirina malên sivîlan û saziyên binghîn ên xizmetguzariyê, rewşa taxên ku ev ji zêdetirî 5 meh in dorpêçkirî ne, metirsîdar e, nemaze ku pêdiviyên bingehîn bi taybetî li nexweşxane û navendên tenduristiyê nemane. Di daxuyaniyê de hat diyarkirin ku komên êrişkar heya niha nehêlane bijîşk alîkariya mirovî ji bo rakirina birîndaran, derbasî taxan bibin, êriş berdewam dikin û wiha hat gotin: “Ev yek binpêkirina mafên mirovan û qanûnên navneteweyî ne.”
‘Rê vebe em amade ne’
Heyva Sor a Kurd di dawiya daxuyaniya xwe de bang li hemû aliyên navneteweyî û xwecih ên têkildar kir ku berpirsyariyên xwe yên exlaqî û mirovî bi cih bînin, ji bo rawestandina êrişên li dijî sivîlan têkevin liv û tevgerê, kerîdorên mirovî yên ewle vekin. Her wiha hat ragihanidin ku eger kerîdorên mirovî werin vekirin, ew amade ne ku derbasî taxan bibin da ku birîndaran rakin û alîkariyên mirovî bidin.
Piştî xwendina daxuyaniyê, Hevya Sor a Kurd 15 kamyonên alîkariyê ber bi Helebê ve bi rê kirin.
