Heyeta ÎHDê ya ku serdana girtîgehên Behra Reş û Îdirê kir, destnîşan kir ku tecrîd, lêgerîna nav dev, dirêjkirina înfazê ya bi kêfî û binpêkirina mafên bingehîn di van girtîgehan de pêk tên û bang li rayedaran kir ku ji bo bidawîkirina van pêkanînan gav werin avêtin.
Heyeta Komeleya Mafên Mirovan (ÎHD) ku ji ji Cîgirê Hevserokê Giştî yê ÎHDê Ercan Yilmaz, Rêveberê Navenda Giştî û Hevberdevkê Komîsyona Navendî ya Girtîgehan Yusuf Erdogan û Endamê Desteya Rêveberiya Şaxa ÎHDa Amedê Alî Îhsan Demîrtaş pêk dihat, li Girtîgeha Tîpa S a Îdirê, Girtîgeha Tîpa L a Kalkandereya Rîzeyê, Girtîgeha Tîpa T a Beşîkduzu ya Trabzonê û Girtîgeha Tîpa L a Espiyeyê ya Giresûnê bi 26 girtiyan re hevdîtin pêk anî.
Heyeta ku piştî hevdîtinan li ser hesabên medya dîjîtal ên ÎHDê daxuyanî da û çavderî û binpêkirinên mafan ên tespît kirine, parve kir. Li ser navê şandeyê Ercan Yilmaz axivî.
Heyetê binpêkirinên mafan ên sereke ku piraniya girtiyan bi hevparî anîne ziman û çavderiyên xwe wiha rêz kir:
* Li ser girtiyan pêkanînên tecrîd û îzolasyona giran berdewam dikin.
* Ji aliyê Lijneyên Îdare û Çavdêriyê ve bi nirxandinên razber, bêhincet û dijqanûnî berdana hin girtiyan tê astengkirin û înfaza wan tê dirêjkirin
* Ji ber ku girtî bi sedan kîlometre dûrî malbatên xwe têne ragirtin, mafê rêzgirtina li jiyana malbatî û jiyana taybet tê binpêkirin.
* Mafê gihîştina çalakiyên civakî, çandî, werzişî û xebatên atolyeyan bi awayekî kêfî tê sînordarkirin.
* Bi taybetî girtiyên li Girtîgeha Tîpa L a Espiyeya Giresûnê, ji ber ku pêkanîna lêgerîna nav dev ku zêdetirî pênc salane tê sepandin qebûl nakin, sewqkirina wan a bo nexweşxane û Saziya Tiba Edlî (ATK) nayê kirin û hat diyar kirin ku ev rewş ji bo mafê tenduristiyê dibe sedema binpêkirinên cidî.
‘Gavên pêwîst biavêjin’
Ercan Yilmaz destnîşan kir ku rapora çavdêriyê ya bi hûrgilî serdana li girtîgehan dê di rojên pêş de bi raya giştî re bê parve bikin. Ercan Yilmaz bang li Wezareta Dadê û rayedaran kir ku dawî li van pêkanînên kêfî bînin û got: “Di serî de ji bo pêkanînên tecrîd û îzolasyonê, em bang li Wezareta Dadê, rêveberiyên saziyên înfazkirina ceza yên têkildar û hemû saziyên berpirsiyar dikin ku ji bo rawestandina bilez a dirêjkirina kêfî ya înfazan, binpêkirinên li dijî jiyana malbatî û taybet, astengkirina gihîştina xizmetên tenduristiyê û hemû binpêkirinên din ên mafan, bi taybetî pêkanîna lêgerîna nav dev, gavên pêwîst bên avêtin.”
